اباي قۇنانبايۇلىنا گرۋزيادا ەسكەرتكىش قويىلدى

العاش رەت گرۋزين تىلىندە اقىننىڭ ولەڭدەر جيناعى جارىق كوردى.

گرۋزيانىڭ استاناسىندا قازاقتىڭ ۇلى اقىنى جانە ويشىلى اباي ەسكەرتكىشى رەسمي تۇردە اشىلدى، دەپ حابارلايدى Almaty-akshamy.kz

بۇل شارا قازاقستان مەن گرۋزيا اراسىنداعى ديپلوماتيالىق قاتىناستاردىڭ ورناعانىنا 30 جىل تولۋ مەرەيتويى اياسىندا جۇزەگە استى.

سالتاناتتى ءىس-شارا وسى كۇندەرى تبيليسيدە ءوتىپ جاتقان قازاقستان-گرۋزيا ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسياسىنىڭ 11-وتىرىسى شەڭبەرىندە ۇيىمداستىرىلدى.

ەسكەرتكىشتىڭ اشىلۋىنا ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ، گرۋزيانىڭ ەكونوميكا جانە تۇراقتى دامۋ ۆيسە-مينيسترى گەنناديي ارۆەلادزە، قازاقستان ەلشىسى باۋىرجان مۇحامەتجانوۆ، تبيليسي قالاسى مەرياسىنىڭ، سونداي-اق ەكى ەلدىڭ مينيسترلىكتەرى مەن ۆەدومستۆولارىنىڭ، ب ا ق، بيزنەس وكىلدەرى مەن مادەنيەت قايراتكەرلەرى جانە جەرگىلىكتى تۇرعىندار قاتىستى.

ەلشى ب. مۇحامەتجانوۆ 2021 جىلى قازاقستاندا جانە حالىقارالىق دەڭگەيدە اباي قۇنانباي ۇلىنىڭ 175 جىلدىق مەرەيتويى اتاپ وتىلگەنىن اتاپ ءوتتى. سول جىلى تبيليسي كوشەلەرىنىڭ بىرىنە اباي ەسىمى بەرىلدى جانە دە العاش رەت گرۋزين تىلىندە ونىڭ ولەڭدەر جيناعى جارىق كوردى.

ەسكەرتكىش قازاقستان-گرۋزيا ەكونوميكالىق بىرلەستىگىنىڭ، باتۋمي مۇناي تەرمينالى، «Rompetrol Georgia»، «Halyk Bank Georgia»، «Capital Group» كومپانيالارى مەن اتلاس قوناق ءۇيىنىڭ قارجىلىق قولداۋلارىمەن ورناتىلدى.