ساتىلىمعا «بارىس جىلى» كوللەكسيالىق مونەتالارى شىعارىلدى.
كوللەكسيالىق مونەتالارعا قىزىعۋشىلىق تانىتاتىن قازاقستاندىقتار ونى ينتەرنەت-دۇكەن ارقىلى سالىپ الا الادى، دەپ حابارلايدى Almaty-akshamy.kz.
«قازاقستان ۇلتتىق بانكى 2022 جىلدىڭ 25 قاڭتارىنان باستاپ ينتەرنەت-دۇكەن جۇمىسى قايتا جاندانىپ، «شىعىس كۇنتىزبەسى» مونەتالار سەرياسىنان «بارىس جىلى» كوللەكسيالىق مونەتالارىنىڭ ساتىلىمعا شىعاتىنىن حابارلايدى»،–دەلىنگەن ۇلتتىق بانكتىڭ باسپا ءسوز قىزمەتىنىڭ حابارلاماسىندا.
ۇلتتىق بانك اقپاراتىنا سايكەس، نومينالى 500 تەڭگەلىك كۇمىس شاقالار www.kazcoins.nationalbank.kz پلاتفورماسىندا قۇب ينتەرنەت-دۇكەنى ارقىلى ساتىلادى. مونەتالاردىڭ وڭ جاعىندا اسپان الەمىندەگى جۇلدىزدار كارتاسىندا جۇلدىزدار شوعىرىنىڭ ميفولوگيالىق سيمۆولى، مونەتا دايىندالعان مەتالدى، ونىڭ سىناماسى مەن ماسساسىن بىلدىرەتىن جازۋ بەينەلەنگەن.
مونەتانى اينالدىرا «قازاقستان رەسپۋبليكاسى» جانە «REPUBLIC OF KAZAKHSTAN» دەگەن جازۋلار، كۇننىڭ ستيلدەندىرىلگەن بەينەسى جانە مونەتانىڭ نومينالى بەينەلەنگەن. مونەتالاردىڭ تەرىس بەتىندە شىعىس كۇنتىزبەسى بويىنشا 2022 جىلدىڭ سيمۆولى – بارىس بەينەسى بەينەلەنىپ، اينالدىرا «2022»، «شىعىس كۇنتىزبەسى»، «ۆوستوچنىي كالەندار» جانە «ORIENTAL CALENDAR» جازۋى بار. ىشكى جاعىندا شىعىس كۇنتىزبەسىنىڭ قالعان ون ءبىر سيمۆولى ورنالاسقان.
