الاياقتار جوبا تۋرالى اقپاراتتى تەرىس ماقساتتا پايدالانىپ جاتىر.
سيفرلىق تەڭگە قولما-قول اقشا مەن قولما-قولسىز اقشانىڭ ورنىن اۋىستىرمايدى، قولدانىستا ولارمەن قاتار جۇرەتىن بولادى، دەپ حابارلايدى Almaty-akshamy.kz Baq.kz سىلتەمە جاساپ.
قازاقستان ۇلتتىق بانكى جانە قۇب تولەم جانە قارجى تەحنولوگيالارىن دامىتۋ ورتالىعى (تقتدو) سيفرلىق تەڭگە تۋرالى فەيك اقپاراتتار مەن حابارلامالاردىڭ پايدا بولعانىن ەسكەرتەدى.
سيفرلىق تەڭگە توڭىرەگىندە قىزىعۋشىلىق ارتقاندىقتان، الاياقتار جوبا تۋرالى اقپاراتتى تەرىس ماقساتتا پايدالانىپ، جۇرتتى اداستىرۋعا كوشتى. مەسسەندجەرلەردە جاڭالىقتار شىعارىلىمى فورماتىندا قولما-قول اقشانى سيفرلىق تەڭگەمەن اۋىستىرۋ تۋرالى فەيك اقپاراتتار مەن ۆيدەوروليكتەر تاراپ جاتىر. ال، "سيفرلىق تەڭگە" جوباسىنا ينۆەستيسيا سالۋدى جارنامالاۋشىلار الاياقتىق سايتتاردى جاساۋعا كوشكەن. بۇل حابارلامالاردىڭ بارلىعى دا شىندىققا جاناسپايدى.
سيفرلىق تەڭگە قولما-قول جانە قولما-قول اقشاسىز اۋدارىمداردىڭ ورنىن اۋىستىرۋ ءۇشىن شىعارىلماعان، ول قولدانىستا قاتار جۇرەتىن بولادى. سيفرلىق ۆاليۋتا بىرەگەي تەحنولوگيالىق سيپاتتامالاردىڭ ارقاسىندا قازاقستاننىڭ ۇلتتىق تولەم جۇيەسىن ودان ءارى دامىتۋدى كوزدەيدى، ونىڭ ىشىندە ينتەرنەتسىز تولەم جاساۋ مۇمكىندىگى دە پايدا بولادى.
ءقازىر «سيفرلىق تەڭگە» جوباسى ازىرلەۋ جانە سىناقتان وتكىزۋ كەزەڭىندە تۇر. ۇلتتىق سيفرلىق ۆاليۋتانى ەنگىزۋ بويىنشا ناقتى شەشىم وسى جىلدىڭ سوڭىنا دەيىن قابىلدانادى دەپ جوسپارلانۋدا. ال، ۇلتتىق بانك سيفرلىق ۆاليۋتانىڭ ارتىقشىلىقتارى مەن تاۋەكەلدەرىن، ونىڭ اقشا-كرەديت ساياساتىنا، قارجىلىق تۇراقتىلىققا جانە تولەم قىزمەتى نارىعىنا اسەرىن جان-جاقتى زەرتتەپ جاتىر.
سيفرلىق تەڭگە جوباسى تۋرالى رەسمي اقپارات كوزى – ۇلتتىق بانكتىڭ nationalbank.kz ينتەرنەت-رەسۋرسى جانە تقتدو-نىڭ payfintech.kz سايتى. وزگە سايتتاردىڭ، اسىرەسە «.kz» دومەندىك كەڭىستىگىنەن تىس تىركەلگەن سايتتاردىڭ بۇل جوباعا ەش قاتىسى جوق. كەڭەس الۋ ءۇشىن ۇلتتىق بانكتىڭ 1477 بايلانىس ورتالىعىنا حابارلاسۋعا بولادى.