جاڭاشىل جاستاردىڭ جارىسى.
الماتىداعى ەڭ اسەم ءقوناقۇيدىڭ تورىندە Cyber Games eSports ءتۋرنيرى باستالىپ، ويىن ەكى كۇنگە سوزىلدى. بۇل كۇنى جارىسقا قاتىسۋشىلار مەن قوناقتاردى ايگىلى Counter Strike جانە Dota2 كومپيۋتەرلىك ويىندارىنىڭ كەيىپكەرلەرى قارسى الدى. تۋرنير كوسپلەي-شوۋ قاتىسۋشىلارىنىڭ ساحنالاعان قويىلىمىمەن اشىلدى.
جارىسقا ءۇش ءپان بويىنشا جەتەكشى ستريمەرلەر، بلوگەرلەر قاتىستى. تۇڭعىش رەت ءوتىپ وتىرعان ءتۋرنيردى الماتى قالاسى سيفرلاندىرۋ باسقارماسىنىڭ قولداۋىمەن «ستۋدەنتتىك ەسپورت جونىندەگى ۇلتتىق قاۋىمداستىق»، iPlay eSports كيبەرسپورت پلاتفورماسى ۇيىمداستىردى. سونىمەن، Almaty Cyber Games–2022 ءتۋرنيرى سيفرلىق ويىن-ساۋىق يندۋسترياسىنىڭ ناعىز فەستيۆالىنە اينالدى.
iPlay eSports پلاتفورماسىنىڭ ديرەكتورى دارحان دۇيسەنبييەۆتىڭ ايتۋىنشا، ەسپورت بويىنشا جارىستار ەكى فورماتتا وتكىزىلۋى مۇمكىن.
«بۇل ونلاين جانە LAN-تۋرنيرلەر، وفلاين، ويىنشىلار، كورەرمەندەر جينالعان كەزدە، ويىندار تاراتىلىپ، قوسىمشا ءىس-شارالار ۇيىمداستىرىلادى. ءدال وسى ءىس-شاراعا ءبىز قازاقستاننىڭ اتاقتى كيبەرسپورتشىلارىن، كيبەرسپورتقا تىكەلەي قاتىساتىن، اۋەسقويلىق دەڭگەيدە اينالىساتىن بلوگەرلەردى شاقىرىپ وتىرمىز. مۇنداي اۋقىمدى ءىس-شاراعا 16 جاستان اسقان كەز كەلگەن ادام قاتىسا الادى، ءبىراق كامەلەتكە تولماعاندار ءۇشىن اتا-اناسىنىڭ جازباشا رۇقساتى تالاپ ەتىلەدى. بۇل جولى ءبىز جارىستى الماتىلىقتار اراسىندا وتكىزەمىز. ءساتىن سالسا، كەلەسى جىلى پلاتفورمانى حالىقارالىق دەڭگەيگە شىعارعىمىز كەلەدى. بۇل ەڭ الدىمەن، ءتۋريزمدى دامىتۋعا كومەكتەسەدى، ويتكەنى بۇگىنگى تاڭدا كيبەرسپورت اۋديتورياسىنىڭ ميلليونداعان ادامدارى بار. ەگەر وسىنداي اۋقىمدى ءىس-شارالار وتكىزىلىپ تۇرسا، قازاقستان ءۇشىن بۇل جاقسى پيار-جارناما دەپ ويلايمىن. مۇنداي ءىس-شارالار بارىسىندا بەلسەندى سپورتشىلار ارقىلى جاستارعا گەيمينگ پەن ەسپورت اراسىندا ايىرماشىلىقتار بار ەكەنىن جەتكىزە الامىز»، – دەيدى دارحان دۇيسەنبييەۆ.
IPlay eSports پلاتفورماسىنىڭ ديرەكتورىنىڭ ايتۋىنشا، eSports – بوكس، فۋتبول، شاحمات سياقتى سپورت ءتۇرى، ول 2018 جىلدان باستاپ رەسمي تۇردە تانىلعان.
جالپى، ويىنشىلاردىڭ بارلىق ۋاقىتتارىن ويىنعا جۇمساۋىنىڭ قاجەتى جوق، كۇندەلىكتى ۇزىلىسپەن جاتتىعۋلارىنا بولادى. ەڭ باستى ۋاقىتتى، ارينە، وقۋعا ارناۋلارى كەرەك.
ءىس-شارانى بىرلەسىپ ۇيىمداستىرىپ وتىرعان «ستۋدەنتتىك كيبەرسپورت جونىندەگى ۇلتتىق قاۋىمداستىق» زتب ەكى جىل بۇرىن قۇرىلعان. بۇگىندە ونىڭ قۇرامىنا الماتى قالاسى عانا ەمەس، استانانىڭ 15 جوو كىرەدى. ستۋدەنتتىك ەسپورت جونىندەگى ۇلتتىق قاۋىمداستىقتىڭ پرەزيدەنتى اسقار نۇرپەيىسوۆتىڭ ايتۋىنشا، ءبىرىنشى ماۋسىمدا ول باسقاراتىن ۇيىمنىڭ، سونداي-اق قازاقستاندىق ەسپورت فەدەراسياسى مەن ۇلتتىق وليمپيادا كوميتەتىنىڭ قولداۋىمەن ءتورت ويىن وتكىزىلگەن ەكەن.
«ءبىزدى الماتى قالالىق اكىمشىلىگى مەن كيبەر ويىندار وتكىزەتىن iPlay eSports ۇيىمى شاقىرىپ وتىر. وسى ءتۋرنيردىڭ كەرەمەت ۇيىمداستىرىلعانى ءۇشىن ولارعا العىسىمدى بىلدىرگىم كەلەدى. بۇگىنگى تاڭدا كيبەرسپورت ەرەكشە قارقىن الۋدا. ماسەلەن، سپورت زالدارىنا باس سۇقساڭىز، كوپتەگەن سپورت تۇرلەرىنىڭ ارتتا قالعانىن جاستاردىڭ تەلەفونداردا، گادجەتتەردە وتىرعانىنان بايقاۋعا بولادى. ءبىزدىڭ تۋرنيرلەرگە نەگىزىنەن it-ۋنيۆەرسيتەتتەر قاتىسادى. ءقازىر جاڭا زامان، ۋاقىتقا ىلەسىپ وتىرماسا بولمايدى. دەگەنمەن، ءبىز ەسپورتتىڭ وقۋعا زيانىن تيگىزگەنىن قالامايمىز. ءبىزدىڭ باستى شارتىمىز – ەسپورت سپورت رەتىندە قابىلدانادى، ياعني كۇنىنە ەكى ساعات جاتتىعىپ، قالعان ۋاقىتتى وقۋعا ارناۋ كەرەك. ەگەر بىرەۋ وقۋدا ۇلگەرمەسە، ءبىز، ارينە، وعان جاۋاپ بەرەمىز»،– دەيدى اسقار نۇرپەيىسوۆ.
ءوز كەزەگىندە قالالىق سيفرلاندىرۋ باسقارماسىنىڭ باس مامانى ەراسىل جەڭىسوۆ كيبەرسپورت it-مەن تىكەلەي بايلانىستى ەكەنىن اتاپ ءوتتى.
«ءبىز بارلىق قاتىسۋشىلار اراسىندا كوممۋنيكاسيا قۇرۋ جانە قالامىزدىڭ بازاسىندا كيبەرسپورتتى تولىققاندى دامىتۋ ءۇشىن جۇمىس ىستەۋى ءتيىس ەكوجۇيەنى كوتەرگىمىز كەلەدى. ەگەر ەسپورت بەلسەندى داميتىن بولسا، وندا وڭتۇستىك استانانىڭ ۋنيۆەرسيتەتتەر بازاسىندا جاڭا فاكۋلتەتتەر – ەسپورت نەمەسە ويىن يندۋسترياسى اشىلۋى مۇمكىن، وسىعان بايلانىستى جاڭا جۇمىس ورىندارى پايدا بولادى. ءبىز ءقازىردىڭ وزىندە جاڭا كاسىپتەر اشاتىن حالىقارالىق تەحنولوگيالىق كومپانيالاردى تارتا الامىز. ەگەر ءبىز كيبەرسپورتتى دامىتۋ اياسىندا ارەكەت ەتسەك، ينتەرنەت-پروۆايدەرلەرمەن بۇرىننان كەلە جاتقان ماسەلەنى شەشەتىن بولامىز، سوندا بىزدە ينتەرنەت جاقسى جۇمىس ىستەيدى. رەسەي، جۇڭگو نەمەسە ەۋروپا ەلدەرىنىڭ تاجىريبەسىن ەسكەرە وتىرىپ، ءبىز تۋرنيرلەردى ۇيىمداستىرۋدىڭ حالىقارالىق وپەراتورى بولساق، بۇل بىزگە كەم دەگەندە ىشكى جانە سىرتقى ءتۋريزمدى دامىتۋعا مۇمكىندىك بەرەر ەدى»، - دەيدى ەراسىل جەڭىسوۆ.
