ۇلتتىق بانك ەسكەرتەدى!

الاياقتار جاساندى ينتەللەكتتى قولدانۋعا كوشىپتى.

ولار ادامداردان اقشا جىمقىرۋ ءۇشىن تۋىسىنىڭ، ارىپتەسىنىڭ، تانىسىنىڭ، قانداي دا ءبىر مەديا-تۇلعانىڭ اتىنان بايلانىسقا شىعادى ەكەن، دەپ حابارلايدى Almaty-akshamy.kz

«ادامنىڭ شىنايى داۋىسىن قالاي كەلتىرەدى دەيسىز عوي. ول ءۇشىن الاياقتار مەسسەندجەرلەردەگى (WhatsApp، Telegram جانە ت.ب.) اككاۋنتتاردى بۇزىپ، داۋىستاپ ايتىلعان حابارلامالاردى كوشىرىپ الادى دا، نەيروندىق جەلىگە جۇكتەيدى ەكەن. يا بولماسا داۋىس وزگەرتەتىن تەحنولوگيالاردى قولدانادى. كەيىن سمارتفون يەسىنىڭ داۋىسى اقشا جىبەرۋدى سۇرايتىن وتىنىشكە اينالىپ، داۋىستىق حابارلاما تۇرىندە جىبەرىلەدى، ءتىپتى سول ادامنىڭ اتىنان ماتىنمەن دە كەلۋى مۇمكىن»، دەپ ەسكەرتەدى ەلىمىزدىڭ باس بانكى.

سمارتفونعا بۇزىپ كىرۋ ءۇشىن الاياقتار ۇيالى بايلانىس وپەراتورىنىڭ تەحنيكالىق قولداۋ قىزمەتىنەن بولامىز دەپ قوڭىراۋ شالىپ، تەلەفونعا كەلگەن كودتى سۇرايدى. زاردابى زور سىلتەمەلەر بالالار بايقاۋىنا داۋىس بەرۋ نەمەسە الەۋمەتتىك ماڭىزى بار تاقىرىپتاردا ساۋالناماعا قاتىسۋعا شاقىرۋ تۇرىندە دە جىبەرىلۋى مۇمكىن.

ءموبيلدى تەلەفونىڭىزدى سىرتتان بۇزىپ كىرۋگە جول بەرگىڭىز كەلمەسە، كۇدىكتى سىلتەمەلەرگە وتپەڭىز. سوسىن تەلەفونعا كەلگەن كود پەن ءپارولدى ەشكىمگە ايتپاڭىز دا جىبەرمەڭىز.

«ۇلتتىق بانكتىڭ قىزمەتكەرلەرى مەسسەندجەر ارقىلى اۋديو/ۆيدەوقوڭىراۋ شالمايدى. بانك قىزمەتكەرى بولىپ قوڭىراۋ شالعان اداممەن اراداعى اڭگىمەنى ءۇزىپ، قانداي دا ءبىر شاراعا نەمەسە تولەم وپەراسيالارىن جۇرگىزۋگە قاتىسۋدان باس تارتىڭىز»، دەپ جازىلعان رەسمي حابارلامادا.