استاناعا جۇڭگو حالىق رەسپۋبليكاسىنىڭ قورعانىس ءمينيسترى ادميرال دۋن ءسزيۋننىڭ باسشىلىعىمەن كەلگەن اسكەري دەلەگاسيا قازاقستاننىڭ قورعانىس مينيسترلىگىندە بولدى.
گەنەرال-پولكوۆنيك رۋسلان جاقسىلىقوۆ ارىپتەسىن قحر قورعانىس ءمينيسترى لاۋازىمىنا تاعايىندالۋىمەن قۇتتىقتادى، دەپ حابارلايدى Almaty-akshamy.kz ق ر قورعانىس مينيسترلىگىنە سىلتمە جاساپ
«ءسىزدىڭ بۇل لاۋازىمداعى العاشقى ساپارىڭىز قازاقستاننان باستالۋىنىڭ وزىندىك ءمانى بار. بۇل ەكى ەل اراسىنداعى ۇلكەن سەنىم مەن دوستىق قارىم-قاتىناستىڭ بەلگىسى. وسى وقيعا قورعانىس ۆەدومستۆولارى اراسىنداعى عانا ەمەس، ەكى ەل اراسىنداعى ىنتىماقتاستىقتى نىعايتاتىنىنا سەنىمدىمىن»، – دەپ اتاپ ءوتتى ول.
قازاقستاننىڭ قورعانىس ءمينيسترى ۆەدومستۆولاردىڭ بىرلەسكەن وقۋ-جاتتىعۋلار وتكىزۋگە مۇمكىندىكتەرى، سول سياقتى كادرلاردى وقىتۋ، مادەنيەت جانە سپورت سالاسىنداعى بايلانىستاردى كەڭەيتۋ تۇرعىسىنان الەۋەتى بار ەكەنىن اتاپ ءوتتى.
كەزدەسۋ بارىسىندا قازاقستان مەن جۇڭگو قورعانىس ۆەدومستۆولارىنىڭ باسشىلارى گەنەرال-پولكوۆنيك رۋسلان جاقسىلىقوۆ پەن ادميرال دۋن سزيۋن ەكىجاقتى قاتىناستاردىڭ قازىرگى جاي-كۇيىن جانە ولاردى دامىتۋ كوكجيەگىن تالقىلادى.
ادميرال دۋن سزيۋن سۇحباتتاسۋشىعا ريزاشىلىعىن ءبىلدىرىپ، قورعانىس ۆەدومستۆولارى اراسىنداعى ىنتىماقتاستىقتى تەرەڭدەتۋ جانە دامىتۋ نيەتىن قولدادى.
«قورعانىس مينيسترلەرى رەتىندە ەكىجاقتى قارىم-قاتىناستى نىعايتۋدا بىزگە جۇكتەلگەن ۇلكەن ميسسيا بار. مەنىڭ ساپارىم شىۇ-عا مۇشە مەملەكەتتەر قورعانىس مينيسترلەرىنىڭ كەڭەسى اياسىندا وتەدى. شىۇ اياسىنداعى ءوزارا قارىم-قاتىناستى نىعايتۋ – باسىم مىندەتتەردىڭ ءبىرى»، – دەدى ادميرال دۋن سزيۋن.
ول شانحاي ىنتىماقتاستىق ۇيىمىنا ءتوراعالىق ەتۋ اياسىنداعى قازاقستاننىڭ ەلەۋلى جۇمىسىن اتاپ ءوتتى.
كەزدەسۋ سوڭىندا قورعانىس ۆەدومستۆولارى قازاقستان مەن جۇڭگو اراسىنداعى 2024 جىلعا ارنالعان ەكىجاقتى اسكەري ىنتىماقتاستىق جوسپارىنا قول قويدى.
جۇڭگو قورعانىس ۆەدومستۆوسىنىڭ باسشىسى ادميرال دۋن سزيۋن ق ر قورعانىس مينيسترلىگىنىڭ قۇرمەتتى قوناقتارى كىتابىنا قولتاڭبا قالدىردى.