دەسانتتىق-شابۋىلداۋ اسكەرلەرىنىڭ پاراشيۋتتىك كومانداسى تۇركيادا وتەتىن «ەفەس-2024» حالىقارالىق وقۋ-جاتتىعۋىنا قاتىسۋعا دايىندالۋدا.
جاتتىعۋلار قونايەۆ گارنيزونىنداعى 32363 اسكەري ءبولىمىنىڭ بازاسىندا 10 ءساۋىر مەن 05 مامىر ارالىعىندا «وڭتۇستىك جاڭا ىلە» سەكىرۋ الاڭىندا وتكىزىلەدى، دەپ حابارلايدى Almaty-akshamy.kz قورعانىس مينيسترلىگىنە سىلتەمە جاساپ.
پاراشيۋت كومانداسىنىڭ قۇرامىندا – 16 ادام، ونىڭ بەسەۋى اسكەري قىزمەتشى ايەلدەر.
تاجىريبەلىك ساباقتار بارىسىندا قاتىسۋشىلار مي-17 تىكۇشاعىنان 2000 مەتر بيىكتىكتەن، سونداي-اق سي-295 ۇشاعىنان «د 1،5ۋ» پاراشيۋت جۇيەسىمەن جانە كەيىننەن «ينسايدەر 300 SF» پاراشيۋت جۇيەسىمەن 3000 مەتر بيىكتىكتەن سەكىرەدى.
سەكىرۋ كەزىندە سپورتشىلار پاراشيۋت اشىلعانعا دەيىن دۇرىس ەركىن قۇلاۋدى ورىنداۋى كەرەك، بۇل باعدارلامانىڭ وتە ماڭىزدى ەلەمەنتى. تۇپكى ماقسات – 3500 مەتر بيىكتىكتەن سەكىرۋ، ونىڭ 2000 مەترىنە دەيىن پاراشيۋتشى ەركىن قۇلاۋدى ورىندايدى. بۇدان وزگە جەكە قۇرامدى دەسانتتاۋ ءۇشىن ولارعا ءارتۇرلى تيپتەگى پاراشيۋتتەردى وراۋ كۋرسى وتكىزىلەدى.
ەل نامىسىن قورعاۋشىلار قاتارىندا ەفرەيتور بالجان مۇساتايەۆا دا بار. 2013 جىلى ول قازاقستان ارمياسىنىڭ قاتارىنا شاقىرىلعان. وسى ۋاقىت ىشىندە بالجان ءار ءتۇرلى پاراشيۋت جۇيەلەرىمەن 120-دان اسا پاراشيۋتپەن سەكىرگەن.