ءوز ۋاقىتىندا جەتكىزۋدى قامتاماسىز ەتۋ ءۇشىن بارلىق قاجەتتى كەلىسىمدەر بار.
ۇلتتىق بانك ماماندارى ايىرباستاۋ پۋنكتتەرىندەگى قولما-قول شەتەل ۆاليۋتاسىنا قاتىستى جاعداي تۋرالى تۇسىنىك بەردى، دەپ حابارلايدى Almaty-akshamy.kz.
ۇلتتىق بانك قازاقستان رەسپۋبليكاسىندا شەتەلدىك ۆاليۋتاداعى وپەراسيالارعا شەكتەۋ ەنگىزۋ تۋرالى قاۋلى نەمەسە باسقا دا زاڭعا تاۋەلدى اكتىلەر قابىلداماعانىن حابارلادى. باس بانكتىڭ تۇسىندىرۋىنشە، قولما-قول شەتەل ۆاليۋتاسىن شىعارۋ كەزىندە تۋىنداعان قيىندىقتار، ەڭ الدىمەن، حالىق تاراپىنان سۇرانىستىڭ وسۋىنە، سونداي-اق شيەلەنىسكە تولى گەوساياسي جاعداي اياسىندا قازاقستانعا باسقا ەلدەردەن قولما-قول شەتەل ۆاليۋتاسىن جەتكىزۋدەگى لوگيستيكالىق كەدەرگىلەرگە بايلانىستى تۋىنداپ وتىر.
«قازىرگى جاعدايدى ەسكەرە وتىرىپ، ۇلتتىق بانك اقش-تىڭ ورتالىق بانكى - فەدەرالدىق رەزەرۆتىك جۇيەدەن قولما-قول شەتەل ۆاليۋتاسىنىڭ قوسىمشا كولەمىن جەتكىزۋ امالدارىن قاراستىرىپ جاتىر. سونداي-اق، بىزدە قولما-قول اقشانى كولىك كومپانيالارىمەن ءوز ۋاقىتىندا جەتكىزۋدى قامتاماسىز ەتۋ ءۇشىن بارلىق قاجەتتى كەلىسىمدەر بار ەكەنىن حابارلايمىز»، - دەلىنگەن ۇلتتىق بانكتىڭ باسپا ءسوز قىزمەتىنىڭ حابارلاماسىندا.