قازاقتىڭ راديوسىنىڭ تاريحىنا - ءبىر عاسىر!
قازاق راديوسىنىڭ قۇرىلعانىنا بيىل – 100 جىل. الاش ارىسى احمەت بايتۇرسىن ۇلىنىڭ باستاماسىمەن رەسپۋبليكالىق راديو تۇڭعىش رەت 1921 جىلى 1 قازاندا ورىنبور قالاسىنان حابار تاراتقان، دەپ حابارلايدى Almaty-akshamy.kz.
مەرەيتويعا وراي اقپارات قۇرالىنىڭ الماتى قالاسىنداعى عيماراتىندا مەموريالدىق تاقتا اشىلىپ، سول ماڭداعى ايالداماعا «قازاق راديوسى» اتاۋى بەرىلدى. عاسىر بويى حالىقتى تاڭمەن بىرگە وياتىپ، قالتقىسىز قىزمەت ەتىپ كەلە جاتقان قاراشاڭىراقتا ءار جىلدارى امىرە قاشاۋبايەۆ، احمەت جۇبانوۆ، شاكەن ايمانوۆ، انۋاربەك بايجانبايەۆ، ءشامشى قالداياقوۆ، مۇقاعالي ماقاتايەۆ، ەرمەك سەركەبايەۆ سىندى ءبىرتۋار تۇلعالار قىزمەت ەتتى. سولاردىڭ داۋىستارى مەن شىرقاعان اندەرى «التىن قوردا» ساقتاۋلى.
«بۇگىن جۇرەكجاردى قۋانىش. قازاق راديوسى – ۇلتتىڭ ءۇنى. كەشەگىمىز، بۇگىنىمىز، ەرتەڭىمىز – قازاق راديوسى. قازاق راديوسىنان ءبىزدىڭ ءتۇرىمىز كورىنبەسە دە، جۇرەگىمىز كورىنەتىن»، - دەيدى قازاق راديوسىنىڭ ارداگەرى قىمبات ءابىلدا قىزى.
100 جىلدا راديونىڭ باي مۇراسى جيناقتالدى. ءجۇز مىڭداعان ادەبي-سازدى باعدارلاما ميلليونداعان تىڭداۋشىنىڭ كوڭىلىنەن شىقتى. «التىن قور» – راديونىڭ نەگىزگى بايلىعى. سول مول مۇراعات سۇرىپتالىپ، سيفرلاندىرىلىپ كەلەدى.
«قازاق راديوسى – بۇگىندە بىرلىك پەن كەلىسىمنىڭ بىرەگەي ۇلتارالىق مودەلىنىڭ كوشباسشىسى. ءبىزدىڭ راديو ورىس جانە قازاق تىلدەرىندەگى ەتنوسارالىق باعدارلامالارىمىزدى گەرمانيادا، شۆەيساريادا، اۆستريادا، قازاندا، ءازىربايجاندا، ۇرىمشىدە تىڭدايدى. سونىمەن قاتار بىزگە جىلى لەبىزدەرىن دە جىبەرىپ وتىرادى. سوندىقتان ءبىزدىڭ راديو بارلىق جاعدايدا اڭىزعا اينالعان دەپ ەسەپتەيمىن»، - دەيدى «موستى» نەمىس باعدارلاماسىنىڭ جۇرگىزۋشىسى تاتيانا جانديلدينا.
مەرەيتويلىق شارا بارىسىندا الماتىداعى ۇلتتىق كىتاپحانادا راديونىڭ تاريحىنا ارنالعان كورمە ۇيىمداستىرىلدى.