اقساي شاتقالىنداعى ءورت ءالى وشكەن جوق
الماتى وبلىسىنىڭ اقساي شاتقالىنداعى ءورت ءالى تولىقتاي وشىرىلگەن جوق. الماتى وبلىستىق توتەنشە جاعدايلار دەپارتامەنتىنىڭ باسپا ءسوز قىزمەتىنەن ءمالىم ەتكەندەي، جاقىن ماڭداعى ەلدى مەكەندەرگە ءتونىپ تۇرعان ءقاۋىپ جوق، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
«2021 جىلعى 29 قىركۇيەكتە ساعات 08-00-دەگى جاعداي بويىنشا، الماتى وبلىسى قاراساي اۋدانىنىڭ اقساي شاتقالىنداعى «ىلە-الاتاۋ» مۇتپ اۋماعىنداعى ءبىر ۋچاسكەدە ازداعان بىقسۋ جانە شىمتەزەك توسەنىشىنىڭ تۇتىندەۋى بار. بۇل ايماقتىڭ اينالاسىندا جەردى قازۋ جانە جىرتۋ جۇمىستارى جۇرگىزىلدى.
ءورت ورنىندا اقساي ورمان شارۋاشىلىعىنىڭ، "قازاۆياورمانقورعاۋ" جانە الماتى وبلىسىنىڭ تجد كۇشتەرى مەن قۇرالدارى جۇمىس اتقارۋدا. ق ر توتەنشە جاعدايلار مينيسترلىگىنىڭ «قازاۆياقۇتقارۋ» اق تىكۇشاعى سۋ شاشىپ جاتىر. بۇگىنگى كۇنى ءتۇتىندى جويۋعا 38 ادام مەن 8 بىرلىك تەحنيكا جۇمىلدىرىلدى.
ەلدى مەكەندەرگە ءقاۋىپ جوق. ەڭ جاقىن ەلدى مەكەن – قىرعاۋىلدى اۋىلى 12 شاقىرىم قاشىقتىقتا جانە "رادۋگا" باۋ-باقشا قوعامى 8 شاقىرىم قاشىقتىقتا ورنالاسقان»، - دەلىنگەن حابارلامادا.
ەستەرىڭىزگە سالا كەتەيىك، 26 قىركۇيەكتەن باستاپ الماتى وبلىسى، قاراساي اۋدانى، اقساي شاتقالىندا، «ىلە-الاتاۋ» مۇتپ اۋماعىنداعى جەتۋى قيىن تاۋلى جەرلەردە، بيىكتىگى 2000 مەتر جەردە ورمان توسەنىشى، جاپىراقتاردىڭ جانە قۇرعاق ءشوپ ورتەنىپ جاتقانىن جازعان بولاتىنبىز.