الماتىدا 1 مامىر – قازاقستان حالقىنىڭ بىرلىگى كۇنىنە وراي مادەني-گۋمانيتارلىق، ەكولوگيالىق ءىس-شارالار لەگى باستالىپ كەتتى.
بۇگىن ناۋرىزباي اۋدانىنداعى «ۇلتتار دوستىعى» ساياباعىندا ءار ۇلت وكىلدەرى بىرلىكتە اعاش وتىرعىزىپ، تاتۋلىق كۇنىنە تارتۋ ەتتى.
رەسپۋبليكالىق «تازا قازاقستان» اكسياسىنا ءۇن قوسقان بۇل ءىس-شارا الماتى قالاسى قازاقستان حالقى اسسامبلەياسىنىڭ ەتنومادەني بىرلەستىكتەرىنىڭ قاتىسۋىمەن ءوتتى.
مۇنداي شارالار كەيىنگى ۇرپاققا تاتۋلىق پەن قورشاعان ورتاعا بولعان جاۋاپكەرشىلىك سەزىمىن سىڭىرەتىن تاماشا ۇلگى دەپ سانايدى قازاقستان كۇردتەرى «باربانگ» رەسپۋبليكالىق قاۋىمداستىعى ءتوراعاسىنىڭ ورىنباسارى ۆاكيل نابييەۆ.
– كورىپ تۇرعاندارىڭىزداي، كوپ ادام مۇندا بالالارىن دا ەرتە كەلدى. بۇل وتە جاقسى داعدى، بالالاردى ەڭبەككە باۋليدى ءارى قالاعا، قورشاعان ورتاعا دەگەن قامقورلىقتى ناقتى ىس-ارەكەتتەرىمەن كورسەتەدى. قاراڭىزشى، قانداي كەرەمەت! اينالا تاپ-تازا، جاسىل جەلەك جايقالىپ، كوز قۋانتادى. بارلىق قازاقستاندىقتاردان قولداۋ تاپقان وسىنداي يگى ءداستۇر جالعاسىن تابا بەرسىن، – دەيدى ۆاكيل نابييەۆ.
«ۇلتتار دوستىعى» ساياباعىنداعى ساق قورىمدارى قالا ىشىندەگى بايىرعى بابالاردان قالعان قۇندى تاريحي ەسكەركىشتەر. ءار ۇلت وكىلدەرىنىڭ ساياباققا اعاش وتىرعىزىپ، اباتتاندىرۋ جۇمىستارىن جاساۋى تۋعان جەر تاريحىنا دەگەن ورتاق قۇرمەتتىڭ سيمۆولى ىسپەتتى.
الماتى قالاسىنداعى وزگە دە ەتنومادەني بىرلەستىك وكىلدەرى دە ەكولوگيالىق ءىس-شارا اتسالىستى. «Cەميرەچيا كازاكتار وداعى» رەسپۋبليكالىق قوعامدىق بىرلەستىگى الماتى قالالىق فيليالىنىڭ جەتەكشىسى سەمون شيحوتوۆ «قازاقستانداعى ءار كۇنىمىز مەيىرىمدى ىستەرگە تولى بولسىن» دەگەن مەرەكەلىك تىلەگىن جولداپ بىلاي دەدى:
«بۇل تەك ەكولوگياعا قوسقان ۇلەس قانا ەمەس، سونىمەن قاتار ەلىمىز ءۇشىن ورتاق جاۋاپكەرشىلىگىمىزدىڭ سيمۆولى. اعاش وتىرعىزۋ – ءتۇرلى ەتنوس وكىلدەرىن ورتاق قۇندىلىققا بىرىكتىرەتىن ءىس. جەرگە دەگەن قامقورلىق، تابيعاتقا قۇرمەت جانە جارقىن بولاشاققا ۇمتىلىس.
قازاقستانداعى ءار كۇن مەيىرىمدى ىستەرگە، بىر-بىرىمىزگە دەگەن قۇرمەتكە جانە ورتاق جارقىن بولاشاعىمىزعا دەگەن سەنىمگە تولى بولسىن! باقىت، بەيبىتشىلىك جانە وركەندەۋ تىلەيمىن!، – دەدى سەمون ۆلاديميروۆيچ.