الماتىدا قازاقستان مەن جۇڭگو اراسىنداعى ستراتەگيالىق ديالوگتىڭ ەكىنشى وتىرىسى ءوتتى.
قازاقستان رەسپۋبليكاسى پرەمەر-مينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ جانە قكپ وك ساياسي بيۋروسىنىڭ مۇشەسى، جۇڭگو حالىق رەسپۋبليكاسىنىڭ سىرتقى ىستەر ءمينيسترى ۆان ي قازاقستان مەن جۇڭگو اراسىنداعى ستراتەگيالىق ديالوگتىڭ ەكىنشى وتىرىسىنا قاتىستى. جۇڭگو ءسىم باسشىسى 26 ساۋىردە وتەتىن «ورتالىق ازيا – جۇڭگو» فورماتىنداعى سىرتقى ىستەر مينيسترلەرىنىڭ كەزدەسۋىنە قاتىسۋ ءۇشىن الماتىعا جۇمىس ساپارىمەن كەلدى.
ستراتەگيالىق ديالوگ وتىرىسى بارىسىندا تاراپتار ساياسي، ساۋدا-ەكونوميكالىق جانە مادەني-گۋمانيتارلىق ىنتىماقتاستىقتىڭ كەڭ اۋقىمدى ماسەلەلەرىن تالقىلادى. مينيسترلەر بيىك جانە جوعارى دەڭگەيلەردە قول جەتكىزىلگەن ۋاعدالاستىقتاردىڭ ىسكە اسىرىلۋ بارىسىن قاراستىردى، سونداي-اق ەكىجاقتى ءوزارا ءىس-قيمىلدىڭ بارلىق سپەكترى بويىنشا قازاق-قىتاي قاتىناستارى دامۋىنىڭ وڭ سەرپىنىن اتاپ ءوتتى.
ساۋدا-ەكونوميكالىق بايلانىستاردى ارتتىرۋ بويىنشا بىرلەسكەن كۇش-جىگەرگە ەرەكشە نازار اۋدارىلدى. قازاقستاننىڭ قىتايعا شيكىزاتتىق ەمەس ەكسپورتىن ۇلعايتۋدى قوسا العاندا، يندۋستريالىق-ينۆەستيسيالىق، ەنەرگەتيكالىق، ترانزيت-كولىكتىك جانە يننوۆاسيالىق ىنتىماقتاستىقتى بىرلەسىپ دامىتۋدا جاڭا تاسىلدەردى ازىرلەۋ قاجەتتىلىگى باسا ايتىلدى.
«ءارقاشان دامي بەرەتىن بايلانىسىمىز گەوساياسي سىن-قاتەرلەر مەن كونيۋنكتۋرالىق ۇردىستەرگە ۇشىرامايدى. جۇڭگو ءبىز ءۇشىن مەيىرىمدى كورشى جانە سەنىمدى دوس قانا ەمەس، سونىمەن قاتار جان-جاقتى بايلانىسى بار جاقىن ەل»، – دەپ مالىمدەدى م.نۇرتىلەۋ.
بىلتىر ەكىجاقتى تاۋار اينالىمى رەكوردتىق كورسەتكىش – 43،8 ملرد اقش دوللارىن قۇرادى. ەكى مەملەكەت تە جاقىن ارادا ءوزارا ساۋدا كولەمىن ەكى ەسەگە ارتتىرۋعا ۇمتىلۋدا. قازاق-قىتاي ينۆەستيسيالىق پۋلى شامامەن 66،4 ملرد اقش دوللارى سوماسىنا 224 جوبانى قامتيدى.
«ءبىز قازاقستاندى قىتايدىڭ كورشىلەس مەملەكەتتەرمەن قارىم-قاتىناسىندا باستى سەرىكتەس رەتىندە قاراستىرامىز. جۇڭگو قازاقستاننىڭ اۋماقتىق تۇتاستىعىن، ەگەمەندىگىن جانە قاۋىپسىزدىگىن قورعاۋدا، سونداي-اق ۇلتتىق ەرەكشەلىكتەرىنە سايكەس ەلدىڭ دامۋىنا باعىتتالعان كۇش-جىگەرىن نىق قولدايدى»، – دەپ مالىمدەدى ۆان ي.
سىرتقى ساياسي ۆەدومستۆولارىنىڭ باسشىلارى بيىل جوسپارلانعان ەكىجاقتى ساپارلار مەن ءىس-شارالار كەستەسىن تالقىلادى، سونداي-اق حالىقارالىق كۇن تارتىبىندەگى وزەكتى ماسەلەلەر بويىنشا «ساعاتتاردى تەڭەستىردى».
كەزدەسۋ قورىتىندىسى بويىنشا قر-قحر سىرتقى ىستەر مينيسترلىكتەرى اراسىندا 2026-2028 جىلدارعا ارنالعان ىنتىماقتاستىق تۋرالى مەموراندۋمعا قول قويىلدى جانە گۋانچجوۋ قالاسىندا قازاقستان رەسپۋبليكاسىنىڭ باس كونسۋلدىعىن قۇرۋ تۋرالى نوتالارمەن الماسۋ ءراسىمى ءوتتى.