الماتىدا ۇوس ارداگەرلەرىنىڭ زيراتىن تازارتۋ بويىنشا جاستار اكسياسى ءوتتى.
ۇلى وتان سوعىسىنداعى جەڭىستىڭ 80 جىلدىعىنا ارنالعان ءىس-شارالار اياسىندا كەڭساي-1 جانە كەڭساي-2 زيراتتارىندا مايدانگەرلەر جەرلەنگەن ورىنداردى تازارتۋ جانە اباتتاندىرۋ بويىنشا جاستار اكسياسى ءوتتى. يگى شاراعا قالا جاستارى، جوعارى وقۋ ورىندارىنىڭ ستۋدەنتتەرى، ۆولونتەرلىك ۇيىمداردىڭ مۇشەلەرى جانە قوعام بەلسەندىلەرى قاتىستى. قاتىسۋشىلار زيرات ماڭىن تازالاپ، اباتتاندىرۋ جۇمىستارىن جۇرگىزدى، سونداي-اق، ارداگەرلەردىڭ زيراتىنا گۇل شوقتارىن قويىپ، رۋحىنا تاعزىم ەتتى.
“اكسيانىڭ باستى ماقساتى – وتاندى قورعاعان ارداگەرلەردىڭ ەرلىگىنە تاعزىم ەتۋ، ولاردىڭ ەسىمدەرىن جادىمىزدا ساقتاۋ جانە جاس ۇرپاقتىڭ بويىندا تاريحي سانانى قالىپتاستىرۋ بولدى”، - دەيدى ۇيىمداستىرۋشىلار.
ال قازاق ۇلتتىق اگرارلىق زەرتتەۋ ۋنيۆەرسيتەتىنىڭ 1-كۋرس ستۋدەنتى ايدا اسىلحان قىزى:
«ءبىز بۇل شاراعا اگرارلىق ۋنيۆەرسيتەتتەن ەرىكتى رەتىندە كەلدىك. كەڭساي زيراتىندا ارداگەرلەردىڭ ەسكەرتكىشتەرىن تازالاۋ ارقىلى تەك قوعامدىق پايدالى ءىس جاساپ قانا قويماي، ءوزىمىزدىڭ رۋحاني جانە يماني تۇرعىدان دا نىعايىپ جاتقانىمىزدى سەزەمىز. بۇل — وتكەنگە قۇرمەت كورسەتۋ عانا ەمەس، ءوزىمىزدى تاربيەلەۋدىڭ دە ءبىر جولى. مۇندا كوپتەگەن ۆولونتەر جينالدى، بارلىعى شىن نيەتىمەن جۇمىس ىستەپ جاتىر. ءبىز ءۇشىن بۇل ۇلكەن ساباق بولدى. ارداگەرلەر كەزىندە ءبىز ءۇشىن جانىن بەردى، ال ءبىز بۇگىندە سول ەرلىكتىڭ ىزىمەن ءجۇرىپ، ولاردى ۇمىتپاۋىمىز كەرەك. حالىقتا جاقسى ءسوز بار: "ءبىز دە ولارداي بولامىز، ولار دا بىزدەي بولعان". وسى ءسوز وسى ساتكە ءدال كەلەتىن سياقتى. وتكەننىڭ ەرلىگىن ۇمىتپاي، سونى باعالاي ءبىلۋ – ءبىزدىڭ باستى مىندەتىمىز»، - دەيدى.
تولەبي وسپان، الماتى قالاسىنىڭ باس يمامى:
بارشانى رۋحاني تاربيەگە شاقىرۋ
بۇگىن باس ءمۇفتي ناۋرىزباي قاجى تاعان ۇلى حازىرەتتىڭ باستاماسىمەن رەسپۋبليكا كولەمىندە زيراتتاردى تازالاۋ شاراسى ءوتىپ جاتىر. الماتى قالاسىندا دا وسى باستاما اياسىندا 8 زيراتتا مەشىت جاماعاتى، ۇجىم مۇشەلەرى جانە يمامدار قاتىسىپ، تازالىق جۇمىستارىن جۇرگىزىپ جاتىرمىز. ماقسات –قالا تۇرعىندارىن زيراتتاردى تازالاۋعا ۇندەۋ، سوعان شاقىرۋ.
ءبىز بارلىق زيراتتى ءبىر كۇندە تولىقتاي تازالاپ ۇلگەرە المايمىز. سوندىقتان بۇل – قالا تۇرعىندارىنا وي سالۋ، اركىم ءوز اتا-اناسىنىڭ، اعايىن-تۋىستارىنىڭ باسىنا بارىپ، قوقىستى جيناپ، سىنعان جەرلەرىن جوندەپ، قۇرمەت كورسەتۋگە باعىتتالعان ارەكەت. ياعني، بۇل – بارشا قوعامدى رۋحاني تاربيەگە شاقىرۋ. بۇگىنگى شاراعا الماتى قالاسى بويىنشا شامامەن مىڭعا جۋىق ادام جۇمىلدىرىلدى. مىسالى، كەڭساي زيراتىنىڭ وزىندە جۇزگە جۋىق ادام قاتىستى. قالاداعى باسقا زيراتتاردا دا ءدال وسىنداي بەلسەندى جۇمىستار جۇرگىزىلىپ جاتىر. كەڭساي زيراتىندا جەرلەنگەن قوعام قايراتكەرلەرى، ۇلت زيالىلارى - دىنمۇحامەد احمەت ۇلى قونايەۆ اتامىزدىڭ، باۋىرجان مومىش ۇلى سىندى ارداگەرلەردىڭ جانە باسقا دا كورنەكتى تۇلعالاردىڭ زيراتتارىن تازالاپ، قۇرمەت كورسەتىپ جاتىرمىز. جۇمىس ۇلكەن قۇرمەتپەن، جاۋاپكەرشىلىكپەن اتقارىلۋدا.