ەكولوگتار سەنبىلىك جاسايتىنىن حابارلادى
ۇلكەن الماتى كانالىنىڭ ماڭى قوقىس الاڭىنا اينالىپ بارادى، دەپ حابارلايدى Almaty-akshamy.kz Almaty.tv-گە سىلتەمە جاساپ.
بوگدە بىرەۋلەر شەكتەۋگە قاراماستان قالا اۋماعىنداعى جازىققا توننالاپ قالدىق پەن توپىراق توگۋىن توقتاتار ەمەس. مەدەۋ اۋدانى اكىمدىك وكىلدەرىنىڭ حابارلاۋىنشا، بۇگىندە ماسەلەگە قاتىستى قاۋىرت جۇمىس جۇرگىزىلىپ جاتىر. اۋماقتى باقىلاۋدا ۇستاۋ ءۇشىن پوليسيا قىزمەتكەرلەرى دە جۇمىلىپتى.
وزەن ارناسىنا قاراما-قارسى جاتقان بۇل جازىققا كىرەتىن 3 بۇرىلىس بار. اكىمدىك وكىلدەرى ءبىرىنشى كىرەبەرىسكە قوقىس توگەتىندەردى بوگەۋ ءۇشىن جولدى قازىپ، تىيىم سالعان. الايدا ەرەجەنى ەسكەرمەگەندەر بۇل جەردى قالپىنا كەلتىرىپ، توپىراقپەن جولدى تەگىستەپ قوقىس توگۋىن جالعاستىرىپ جاتقان كورىنەدى.
«توپىراق توگۋ، قۇرىلىس قالدىقتارىن توگۋ سىندى فاكت انىقتالىپ جاتىر. جىل باسىندا ەكولوگيا دەپارتامەنتى انىقتاۋ ءۇشىن كوميسسيا قۇرىلدى. بيىل 30 ادامعا ايىپپۇل سالىندى. ءالى دە جالعاسىپ جاتىر. پوليسيا قىزمەتكەرلەرىمەن بىرلەسىپ، كۇندەلىكتى باقىلاپ ءجۇرمىز»، – دەدى مەدەۋ اۋدانى اكىمى اپپاراتى اباتتاندىرۋ ءبولىمىنىڭ باس مامانى مارات تىلەسوۆ.
جول جيەگىمەن ءجۇرىپ ءوتىپ، ەكىنشى كىرەبەرىسكە دە كەلدىك. بۇل جەردى، مىنە، كورگەندەرىڭىزدەي اكىمدىك وكىلدەرى تەكسەرۋ جۇرگىزىپ 2 كۇن بۇرىن عانا جولدى تاستارمەن بوگەپ تاستاعان. الايدا مۇنىڭ قانشا ۋاقىت تۇراتىنى، قاشانعا دەيىن جابىق بولاتىنى ازىرگە بەلگىسىز.
سەبەبى «قوي دەيتىن قوجاسى بەلگىسىز» جەردى قانشا جاپسا دا جۇك كولىكتەرى كىرۋدىڭ امالىن تاباتىن كورىنەدى. اكىمدىك وكىلىنىڭ ايتۋىنشا، ولار قويعان بوگەتتى الىپ تاستاعان كەزدەرى دە بولعان. ايتا كەتسەك، قوقىس توككەندەرگە سالىنعان ايىپپۇل كولەمى ازىرگە 2 ميلليون تەڭگەگە جۋىقتادى. مەدەۋ اكىمدىگى ءقازىر باقىلاۋ ءجۇرىپ جاتقانىن مالىمدەسە، ەكولوگتار ەرتەڭ بۇل ماڭعا سەنبىلىك جاسايتىنىن حابارلادى.