جابايى اڭنان ءقاۋىپ ءتونۋى مۇمكىن
جابايى اڭنان ءقاۋىپ ءتونۋى مۇمكىن. الماتىنىڭ بۋتاكوۆكا شاتقالىنان سكاۋتتار لاگەرى ەۆاكۋاسيالاندى، دەپ حابارلايدى Almaty-akshamy.kz Almaty.tv-گە سىلتەمە جاساپ.
لاگەر قىزمەتكەرى جاقىن ماڭايدا مەكەندەيتىن ايۋ ادامدارعا شابۋىلداي ما دەپ قورقادى. ونىڭ ۇستىنە، دەمالىس ورنىنا كەلۋشىلەر قاتارىندا بالالار كوپ.
اننا – سكاۋتتار لاگەرىنىڭ نۇسقاۋشىسى. ول مۇندا سپورتپەن اينالىسۋعا كەلگەن بالالاردى جابايى ورتادا ءومىر سۇرۋگە ۇيرەتەدى. تابيعاتتى ايالاپ، جانۋارلارعا قامقور بولۋعا باۋليدى. اننا وتكەن اپتادا جابايى اڭنىڭ پايدا بولعانىن ايتادى.
دەمالىپ ءجۇرىپ، ايۋدىڭ ىرىلداعان داۋىسىنان قورىققان سكاۋتتار تۇنىمەن كوز ىلمەي، شاتىر جانىندا وت جاعىپ وتىردىق دەيدى. ءتىپتى كومەككە قورىقشىلاردى شاقىرتىپتى. الايدا اۋماقتى بارلاپ شىققان ۇلتتىق پارك ينسپەكتورلارى بولعان جاعدايعا كۇمان كەلتىرگەن.
ماڭايدى تەكسەرىپ شىققان ۇلتتىق پارك ينسپەكتورلارى «قورىققانعا قوس كورىنەدى» دەگەندى العا تارتتى. سوزدەرىنشە، ءقازىر اڭداردىڭ كوبەيەتىن ۋاقىتى. ال بەينەجازباعا جازىلعان دىبىس ەلىكتەردەن شىققان دەيدى.
«شاقىرتۋدى بىردەن قابىلداپ، وسىندا كوتەرىلدىك. جاقىن ماڭايدىڭ ءبارىن ارالاپ شىقتىق. ءبىراق ەشقانداي داۋىس ەستىمەدىك، ەشقانداي جانۋاردى جولىقتىرمادىق. ارىپتەستەرىم اڭداردىڭ ءىزىن تەكسەرىپ شىقتى. مەن لاگەردە، بالالاردىڭ قاسىندا قالدىم»، – دەدى ىلە-الاتاۋ ۇلتتىق پاركىنىڭ ينسپەكتورى رومان ابۋيەۆ.
ۇلتتىق پارك وكىلدەرىنىڭ ايتۋىنشا، بۋتاكوۆكا شاتقالىندا 10 جىلدان بەرى ايۋلار كورىنبەگەن. ويتكەنى مۇندا تۋريستەر كوپ كەلەدى.
«مەنىڭ بىلۋىمشە، ايۋ تۋريستەرگە تيىسپەيدى. سەبەبى ولار ادامداردان قورقادى. سوندىقتان ءقاۋىپ جوق دەپ ەسەپتەيمىن. مۇندا ايۋ بار دەگەننىڭ وزىندە، ولار لاگەرگە جاقىندامايدى»، – دەدى ىلە-الاتاۋ ۇلتتىق پاركىنىڭ ينسپەكتورى نۇربول بەيىسوۆ.
قورىقشىلاردىڭ ايتۋىنشا، ىلە-الاتاۋ ساياباعىندا تاس سۋسارى مەن سىلەۋسىن، بارىس ءجيى كەزدەسەدى. ال زوولوگيا ينستيتۋتىنىڭ عالىمدارى بۇگىندە الماتى تاۋلارىندا 70-كە جۋىق تيان-شان ايۋى مەكەندەيتىنىن العا تارتىپ وتىر. ال لاگەردەگى دەمالۋشىلار ازىرگە شاتقالعا ورالۋدى جوسپارلاپ وتىرعان جوق.