قازاقستانداعى ءىرى جول-كولىك ينفراقۇرىلىمدارىنىڭ ءبىرى – ۇلكەن الماتى اينالما جولى پايدالانۋعا بەرىلدى، دەپ حابارلايدى Almaty-akshamy.kz يندۋستريا جانە ينفراقۇرىلىمدىق دامۋ مينيسترلىگىنە سىلتەمە جاساپ.
ونىڭ رەسمي اشىلۋىنا ق ر ييدم اۆتوموبيل جولدارى كوميتەتىنىڭ ءتوراعاسى تولەگەن ابدۋللين، الماتى قالاسىنىڭ اكىمى ەربولات دوسايەۆ جانە الماتى وبلىسىنىڭ اكىمى مارات سۇلتانعازييەۆ قاتىستى
كولىك جۇرگىزۋشىلەرى جاڭا جولدىڭ ۇستىمەن ءجۇرىپ، ونىڭ ارتىقشىلىقتارىن باعامداپ كوردى. اتالعان اينالما اۆتوجولى ەلىمىزدىڭ تاريحىنداعى العاشقى كونسەسسيالىق جوبا سانالادى. ونىڭ قۇرىلىسى 3 جىل بۇرىن تۇرىك-كورەيالىق كونسورسيۋمىنىڭ نەگىزىندە قولعا الىنىپ، جوسپارعا سايكەس 2024 جىلى قولدانىسقا بەرىلۋى كەرەك ەدى. دەسە دە قارقىندى جۇمىستاردىڭ ناتيجەسىندە بۇل نىسان مەرزىمىنەن بۇرىن تاپسىرىلىپ وتىر.
ق ر ييدم اۆتوموبيل جولدارى كوميتەتىنىڭ ءتوراعاسى تولەگەن ابدۋللين اۆتوجولدىڭ تيىمدىلىگى مەن باسىمدىقتارىن اتاپ ءوتتى. ونىڭ ايتۋىنشا، ۇلكەن الماتى اينالما اۆتوجولى مەگاپوليس كوشەلەرىندەگى جانە قالا ماڭىنداعى كەپتەلىستى ازايتىپ، ەكولوگيالىق جاعدايدى جاقسارتادى.
«بۇل ەلىمىزدىڭ تاريحىنداعى ماڭىزدى ساتتەردىڭ ءبىرى. سەبەبى ۇلكەن الماتى اينالما اۆتوجولى ورتالىق ازياداعى ەڭ ءىرى ينفراقۇرىلىمدىق جوبا سانالادى. وسى جول قۇرىلىسى حالىقتىڭ يگىلىگى ءۇشىن قولعا الىنعانىن اتاپ وتكەن ءجون. سونداي-اق اتالعان جوبا مەگاپوليس تۇرعىندارى مەن جەرگىلىكتى حالىقتىڭ ەركىن قوزعالۋىنا سەپتىگىن تيگىزەرى انىق»، - دەدى تولەگەن ابدۋللين.
كونسەسسيا تەتىگىنە سايكەس قۇرىلىس جۇمىستارىن ينۆەستور جەكە قاراجاتىن ەسەبىنەن جۇرگىزگەن. ەندى تاياۋ 16 جىل بويى جول ينۆەستوردىڭ كەپىلدىك مەرزىمىندە بولادى. 66 شاقىرىمعا جالعاسقان اينالما جولدى جارتى ساعاتتا ەڭسەرۋگە بولادى.
- بۇگىن ءبىز ماڭىزدى وقيعانىڭ كۋاسى بولىپ وتىرمىز. الماتى قالاسىنىڭ 2040 جىلعا دەيىنگى جاڭا بەكىتىلگەن باس جوسپارى اياسىندا بۇگىندە باكاد-قا باراتىن 6 راديالدى جولدى سالۋ جۇمىستارى جۇرگىزىلۋدە. باكاد-تى اشۋ الماتى قالاسىنىڭ اۋماعىنا ترانزيتتىك ترافيكتىڭ كىرۋىن ازايتۋ ارقىلى الماتى قالاسىنىڭ جولدارداعى كەپتەلىستى ورتا ەسەپپەن 20%-كە ازايتادى. بۇل قالانىڭ ەكولوگيالىق جاعدايىن جاقسارتادى. الماتى اگلومەراسياسى تۇرعىندارىنا كولىكتىك قىزمەت كورسەتۋ ساپاسىنا وڭ ىقپال ەتەدى، - دەدى الماتى قالاسى اكىمى ە.دوسايەۆ.
كولىك جۇرگىزۋشىلەرى جاڭا جولدىڭ تيىمدىلىگىن بايقاپ، ريزاشىلىقتارىن جەتكىزدى.الماتى وبلىسىنىڭ اكىمى مارات سۇلتانعازييەۆتىڭ ايتۋىنشا، جاڭا جول-كولىك ينفراقۇرىلىمى ءوڭىردىڭ الەۋمەتتىك-ەكونوميكالىق كورسەتكىشتەرىن جاقسارتىپ، حالىقتىڭ ءال-اۋقاتىن ارتتىرۋعا ىقپال ەتپەك.
«اتالعان اينالما اۆتوجولى مەملەكەت-جەكەمەنشىك ارىپتەستىك اياسىندا سالىنعان ەلىمىزدەگى ماڭىزدى ينۆەستيسيالىق جوبالاردىڭ ءبىرى. ول تۇتاستاي ءوڭىردىڭ ەكونوميكالىق دامۋىنا سەرپىن بەرەتىن باتىس جۇڭگو – باتىس ەۋروپا ترانزيتتىك ءدالىزىنىڭ نەگىزگى تارماعى سانالادى. وسى جول وبلىسىمىزدىڭ دامۋىنا اسەر بەرىپ، ينۆەستيسيالىق جانە تۋريستىك الەۋەتتى ارتتىرادى دەگەن سەنىمدەمىز»، دەدى م.سۇلتانعازييەۆ.
اينالما جول 1-ا تەحنيكالىق ساناتى بويىنشا سالىنعان. اتالعان جوبانى قارجىلاندىرۋعا ەۋرازيالىق دامۋ بانكى دە قاتىسقانىن اتاپ وتكەن ابزال.
«ۇلكەن الماتى اينالما اۆتوجولى قازاقستان مەن ەۋرازيا ايماعىندا كولىك مارشرۋتتارىن كەڭەيتۋ بويىنشا ماڭىزدى ءرول اتقارادى. جاڭا نىسان «شىعىس-باتىس» باعىتىنداعى حالىقارالىق اۆتوكولىك مارشرۋتتارىن بايلانىستىرىپ، كولىك قاتىناسىن جاقسارتۋعا، جۇك تاسىمالىنىڭ مۇمكىندىكتەرىن كەڭەيتۋگە وڭ ىقپال ەتەدى. وسى جول ارقىلى تاسىمالداناتىن جۇكتىڭ بولجامدى كولەمى تاياۋ 10-15 جىلدا 87%-عا ۇلعايىپ، 35،9 ملن تونناعا جەتۋگە ءتيىس»، دەدى ەۋرازيالىق دامۋ بانكىنىڭ باسقارما ءتوراعاسى نيكولاي پودگۋزوۆ.
رەسمي بولىمنەن كەيىن جاڭا جولدىڭ بويىمەن بىرنەشە كولىك ءجۇرىپ ءوتتى. اتاپ ايتقاندا، ءۇاااج بەلگىلەرى بار 10 اۋىر جۇك كولىگى، 10 اۆتوبۋس جانە جەڭىل اۆتوكولىكتەر قاسكەلەڭ قالاسىنا دەيىن جول تارتتى.