ۇلكەن الماتى اينالما اۆتوموبيل جولى – 1-ا تەحنيكالىق ساناتىنداعى اۆتوبان. بۇل تۋرالى «ءۇاااج ينۆەستيسيالار مەن وپەراسيالار» ج ش س ديرەكتورى ايمان جانۇزاقوۆا-باران ايتتى، دەپ حابارلايدى Almaty-akshamy.kz.
«ءۇاااج-نىڭ جالپى ۇزىندىعى – 66 شاقىرىم. ونىڭ 52 شاقىرىمى 6 جولاقتىق، 14 شاقىرىمى 4 جولاقتىق جول. بۇل جولدا ساعاتىنا 120-140 شاقىرىم جىلدامدىقپەن جۇرۋگە بولادى. جالپى، جول بويىندا 43 كوپىر بار. اينالما جول الماتى وبلىسىنىڭ ءۇش اۋدانىن باسىپ وتەدى: قاراساي، ىلە، تالعار اۋدانى. جوسپارعا سايكەس، جولدا ءجۇرۋ اقىلى تۇردە بولادى. ءبىز توقتاۋسىز قوزعالىس كەزىندە بولاتىن اقىلى جۇيەنى جوسپارلاپ جاسادىق. باقىلاۋ اركالارى ارقىلى توقتاۋسىز وتۋگە بولادى، وندا ءبىزدىڭ بەينەكامەرالار كولىكتەردى ءتۇسىرىپ، كەيىن كولىك يەسىنە جول اقىسى تۋرالى حابارلاما جىبەرىلەدى»، - دەدى سپيكەر.
ول سونداي-اق، ۇلكەن الماتى اينالما اۆتوموبيل جولى يندۋستريا جانە ينفراقۇرىلىم مينيستىرلىگىنىڭ كومەگىمەن، ەۋروپالىق قايتا قۇرۋ جانە دامۋ بانكى، ەۋرازيالىق دامۋ بانكى، يسلام دامۋ بانكىنىڭ سينديكات بانكتەر بولۋىمەن سالىنعانىن ايتتى، دەپ جازدى قازاقپارات.
«كونسەپسيا شارتىنا 2018 جىلى قول قويىلعان ەدى. 2020 جىلدىڭ تامىز ايىندا قارجىلىق جابۋدى اياقتادىق. وسىدان سوڭ ءۇاااج قۇرىلىسى باستالدى. كونسەپسيا بويىنشا قۇرىلىس مەرزىمى 50 اي بولعان ەدى، الايدا مەردىگەر كومپانيالارىمىزدىڭ كومەگىمەن قۇرىلىس جۇمىستارىن 32 ايدا بىتىردىك. جالپى، جول سالۋ كەزىندە اۋماعى 22 ملن كۋب-تەن استام جەردە جۇمىس ءجۇردى، 7 كولىك ايرىعى سالىندى. جول جابىندىسى اسفالت-بەتون قوسپاسىنان جاسالدى. قۇرىلىس اياقتالعان سوڭ ءبىز ەندى پايدالانۋ مەرزىمىنە كوشتىك. ءبىز جولدى 15 جىل بويى كۇتىپ ۇستاۋدى جوسپارلاپ وتىرمىز»، - دەدى ايمان جانۇزاقوۆا-باران.