جەتىسۋدا ۇمىت قالعان تالانتتى اقىن قايرات الىمبەكوۆتىڭ «جوق ىزدەگەن جىگىت» جىر جيناعى جارىق كوردى، دەپ حابارلايدى Almaty-akshamy.kz.
ارىندى اقىن، قارىمدى جۋرناليست قايرات الىمبەكوۆتى بۇگىنگى قازاق ادەبيەتىنىڭ اعا بۋىنى جاقسى بىلەدى. ۋاعىندا قازاق باسپا ءسوز سالاسىندا ءوزىنىڭ قولتاڭباسىن قالدىرىپ، جىر الەمىندە دە جۇيرىكتەردىڭ ءبىرى اتانعان. ايتسە دە عۇمىردارياسى قىسقا بولدى. بەرتىن كەلە ەسىمى دە ۇمىتىلا باستادى. دەگەنمەن جەتىسۋ وبلىسىنىڭ اكىمى ءھام بىرگە وقىعان دوسى بەيبىت يسابايەۆ باستاعان قالامداس ارىپتەستەرى قالامگەردىڭ مۇراسىن قايتا جاڭعىرتۋعا بەل بايلادى. بۇدان بۇلاي وبلىس كولەمىندە جىل سايىن ءداستۇرلى تۇردە اقىننىڭ رۋحىنا ارنالعان ءمۇشايرا ۇيىمداستىرىلادى.
BAQ.kz تاراتقان مالىمەت بويىنشا، اۋەلى ءبىر توپ زيالى قاۋىم ءارى زامانداستارى قاراتال اۋدانىڭداعى اقىن جەرلەنگەن زيراتقا بارىپ، توپىراق الىپ، قۇران باعىشتادى. ودان كەيىن م.تىنىشبايەۆ اتىنداعى تاريحي-ولكەتانۋ مۋزەيىندە اقىن قايرات الىمبەكتىڭ ءومىرى مەن شىعارماشىلىعىنا ارنالعان «عازال-عۇمىر جارقىلى» بۇرىشى اشىلدى. مۇندا اقىننىڭ جەكە زاتتارى قويىلعان. وقىرماندار مۋزەيدەن قالامگەردىڭ قىلقالامىن، وتباسىلىق سۋرەتتەرىن، كۋالىكتەرىن، جازۋ ماشيناسىن، پورتفەلىن، كوستيۋمىن، ءارتۇرلى ماقتاۋ قاعازدارى مەن دومبىراسىن كورە الادى.
قازىرگى «جەتىسۋ» وبلىستىق گازەتىندە ارىپتەس بولدىق. كەز كەلگەن تاقىرىپتى جىك-جىگىمەن، بۇتارلاپ تۇرىپ جازاتىن. كولەمدى ماقالالارىن بىلاي قويعاندا، قىپ-قىسقا عانا حاباردىڭ ءوزىن قاراولەڭمەن ورنەكتەپ جىبەرەتىن شەبەرلىگىن دە ۇمىتقان جوقپىز. كەز كەلگەن ماقالاسى ماقال-ماتەلگە، ناقىل سوزدەرگە تۇنىپ تۇراتىن-دى. ۇلاعاتتى سوزدەرگە كەيبىر ارىپتەستەر سەكىلدى ۇزىن-سونار انىقتاما بەرىپ جاتپايتىن، ءارى وزىنە «مەنشىكتەپ» تە الماي، ءاردايىم تىرناقشا ىشىنە سالۋدى ۇمىتپايتىن. سول تىرناقشا ىشىندەگى ءبىر سويلەم باقانداي ءبىر ابزاستىڭ جۇگىن كوتەرىپ تۇراتىن، - دەيدى جۋرناليست كۋرستاسى نۇرجامال الىشيەۆا.
اقىننىڭ ەسكە الۋعا ارنالعان سالتاناتتى شاراعا جينالعان قاۋىم ءبىز ويلاعاننان دا كوپ بولدى. الدىمەن ب.ريموۆا تىنداعى تالدىقورعان دراما تەاترىنىڭ فويەسىندە «جوق ىزدەگەن جىگىت» جىر جيناعىنىڭ تۇساۋى كەسىلدى. سودان كەيىن ساحنا تورىندە اقىننىڭ شىعارماشىلىعى مەن ومىرىنە ارنالعان بەينەفيلم كورسەتىلدى.
«جىرعا اينالعان جامپوزىم» ەسكە الۋ كەشىنىڭ بەتاشار ءسوزىن وبلىس اكىمى بەيبىت وكسىكباي ۇلىنىڭ سويلەپ، ەستى ەستەلىگىمەن ءبولىستى.
«ءبىز قايراتپەن قازمۋ-دە بىرگە وقىدىق، ءبىر بولمەدە تۇردىق. جۋرناليستيكا سالاسىندا 1980ء-شى جىلداردا قاتار قىزمەت ەتتىك، ۇزەڭگىلەس، پىكىرلەس، دوس-جولداس بولدىق. قايراتتىڭ مىنەزى كوپشىل، پاراساتى تەرەڭ، بويىندا لاپىلداعان جالىنى بار، ارىندى، ادۋىندى، رۋحتى ازامات بولاتىن. ونىڭ ويعا ۇتقىر، سوزگە شەشەندىگى، ازاماتتىق بولمىسى، ەلجاندى مىنەزى جىرلارىنان ايقىن اڭعارىلىپ تۇراتىن.
وكىنىشكە قاراي قايرات اقىن ارامىزدان ەرتە كەتتى. نەبارى 43 جىل ءومىر ءسۇرىپ، جاسىنداي جارق ەتىپ وتە شىقتى.
«مەنىڭ تاقىرىبىم - ادام» دەپ ءوزى ايتىپ كەتكەندەي:
اعىل-تەگىل كوڭىلدە تۋلايدى ولەڭ،
داۋىسىمدى تىك تۇرىپ تىڭدايدى الەم.
شات ومىردەن وسىناۋ شابىت الىپ،
جىرلاي بەرەم ادامدى، جىرلاي بەرەم!
- دەپ ولەڭگە اعىنان جارىلدى»، دەدى ءوڭىر باسشىسى ب. يسابايەۆ.
سالتاناتتى شارادا قالامگەردىڭ زامانداستارى مەن ارىپتەستەرى جاستىق شاقتارىنان سىر تارقاتىپ، اقىن جايلى اق لەبىزىن جەتكىزدى. سونداي-اق اقىننىڭ ولەڭدەرىنە جازىلعان اندەر شىرقالىپ، كورەرمەننىڭ ىقىلاسىنا بولەندى.
جيىن سوڭىندا قايرات الىمبەكوۆتىڭ رۋحىنا ارنالعانا اس بەرىلدى.