بۇگىنگى تاڭدا ۇلەسكەرلىك قۇرىلىس توڭىرەگىندە قوردالانعان ماسەلەلەر كەزدەسىپ تۇرادى. قالا بيلىگى بۇل ماسەلەگە قىرىن قاراماي، باستى نازارعا العان. دەسەك تە، ازاماتتاردى الداۋ فاكتىلەرى كەزدەسىپ تۇرادى. الماتى اكىمى ەربولات دوسايەۆ مەدەۋ اۋدانى حالقىمەن كەزدەسۋىندە ۇلەسكەرلەر تاراپىنان ساۋال قويىلدى، دەپ حابارلايدى اlmaty-akshamy.kz
- ءبىز ۇلەسكەرلىك قۇرىلىس بويىنشا «KB Development» قۇرىلىس كومپانياسىنا الدانىپ ءجۇرمىز. «ۆەسنوۆكا» تۇرعىن ءۇي كەشەنىنىڭ قۇرىلىسى توقتاپ قالدى. اقشا دا جوق، پاتەر دە جوق. قۇرىلىسشى پاتەرلەردىڭ ءبىزدىڭ اتىمىزدا جوق ەكەنىن ايتادى. نەلىكتەن «ۆەسنوۆكا» تك پاتەر ساتۋعا تىيىم سالمايسىزدار؟ اگەنت پاتەر ساتۋدى توقتاتپاي كەلەدى؟ وسى جاعدايعا نازار اۋدارساڭىز، - دەپ ءوتىندى تۇرعىن.
الماتى قالالىق قالا قۇرىلىسىن باقىلاۋ باسقارماسىنىڭ باسشىسى باقىتجان ناۋرىزبەكوۆتىڭ مالىمەتى بويىنشا، «Ush Qonyr» تۇرعىن ءۇي كەشەنىن سالعان KB Development كومپانياسى پاتەرلەردى ساتۋ ءۇشىن 2020 جىلدىڭ شىلدەسىندە «Leader Group» كومپانياسىن جالداعان. ءقازىر ولار المالى اۋدانىندا سالىنىپ جاتقان «ۆەسنوۆكا» تۇرعىن ءۇي كەشەنىنىڭ قۇرىلىسىن قولعا الىپتى. مۇندا دا «Ush Qonyr» تۇرعىن ءۇي كەشەنى سەكىلدى پاتەرلەردى ساتۋ ءۇشىن «Leader Group» كومپانياسىن جالداعان. بۇل فاكتىنى باسقارما انىقتاپ، ۇلەسكەرلەرمەن كەزدەسۋ وتكىزگەن. ناتيجەسىندە ارىزدى پوليسيا مەن سىبايلاس جەمقورلىققا قارسى قىزمەتكە تاپسىرىپتى.
- بۇگىنگى كۇنى «Ush Qonyr» تۇرعىن ءۇي كەشەنىنىڭ بارلىق پاتەرلەرى ارەستكە قويىلعان. «ۆەسنوۆكا» تۇرعىن ءۇي كەشەنىنىڭ قۇرىلىسى توقتاپ تۇر. «ليدەر گرۋپپ» كومپانياسىنىڭ قىزمەتى توقتاتىلدى، سەبەبى تەرگەۋ ءجۇرىپ جاتىر. باسشىعا قاتىستى بۇلتارتپاۋ شاراسى قولدانىلدى.
ءتيىستى ماسەلەگە قاتىستى قالا پروكۋرورى بەرىك جۇيرىكتايەۆتىڭ ايتۋىنشا بارلىق ىستەر ءبىر وندىرىسكە بىرىكتىرىلگەن. تىنتۋلەر جۇرگىزىلىپ، بارلىق قۇجاتتار تاركىلەنىپتى. ارنايى ساراپتاما دايىندالعان. 141 پاتەر ارەستتە تۇر ەكەن. ءقازىردىڭ وزىندە بۇل ءىس بويىنشا 50 جابىرلەنۋشى جاۋاپقا تارتىلىپتى.
قالا اكىمى ءتيىستى ورگاندارعا جاعدايدى باقىلاۋعا الىپ، كىنالىلەردى جازالاۋدى تاپسىر.
- قالالىق پروكۋراتۋرادان ءىستى باقىلاۋعا الۋدى، پاتەرلەردى ارەستكە قويۋدى قالاي جۇرگىزىلگەنىن، ونىڭ قالاي جۇمىس ىستەيتىنىن تەكسەرۋدى سۇرايمىن. ال ءبىز ونى انىقتايمىز. ەگەر پاتەرلەردى ساتۋمەن اينالىسقان باسشىعا قاتىستى شەكتەۋ شارالارى قولدانىلسا جانە ول، ۇلەسكەرلەردىڭ ايتۋىنشا، ساتۋدى جالعاستىرسا، وندا ونىڭ كاسىپكەرلىك قىزمەتىن شەكتەۋ قاجەت. ەگەر ول جۇمىسىن جالعاستىرا بەرسە، وندا زاڭدا بەلگىلەنگەن تارتىپپەن ۇسىنىس ەنگىزىڭىز. زاڭ تالابى بويىنشا باس بوستاندىعىنان ايىرىڭىز،- دەپ الماتى قالاسىنىڭ اكىمى ەربولات دوسايەۆ ءتيىستى ورگاندارعا جاعدايدى باقىلاۋعا الۋدى تاپسىردى.