پوليسيانىڭ كينولوگيالىق قىزمەتى – بۇل قىلمىستاردىڭ الدىن الۋ جانە اشۋ، قىلمىسكەرلەردى ىزدەۋ، ۇستاۋ جانە قوعامدىق ءتارتىپتى ساقتاۋ ءۇشىن قىزمەتتىك-ىزدەستىرۋ يتتەردى دايىندايتىن ارنايى ءبولىم.
بۇگىنگى تاڭدا پوليسيا قىزمەتىندە 600-دەن استام ءتۇرلى تۇقىمدى يت بار. ولار نەگىزىنەن ەسىرتكى مەن جارىلعىش زاتتاردى، ادامداردى ىزدەۋ، ءتىنتۋ، ىزگە ءتۇسۋ جانە شابۋىلداۋعا بەيىم بەلگيالىق جانە نەمىس وۆچاركالارى، لابرادور-رەتريۆەرلەر مەن باسقا تۇقىمدى يتتەر، دەپ حابارلايدى Almaty-akshamy.kz Polisia.kz-كە سىلتەمە جاساپ.
كينولوگتار مەن ولاردىڭ قامقورلىعىنداعى يتتەردى بازالىق دايارلاۋ الماتى قالاسىندا ءىىم كينولوگيالىق قىزمەت ورتالىعىندا جۇزەگە اسىرىلادى. مۇندا جىل سايىن 150-گە جۋىق پوليسيا قىزمەتكەرى وقىتۋ جانە قايتا دايارلاۋدان وتەدى. ورتالىقتىڭ تەڭگەرىمىندە 34 قىزمەتتىك يت بار. وتكەن جىلى ورتالىقتا 30 كۇشىك دۇنيەگە كەلدى: 26 نەمىس وۆچاركاسى جانە 4 مالينۋا. كۇشىكتەر 45 كۇنگە تولعاندا العاشقى سىناق – پوليسيا قىزمەتىنە جارامدىلىق تەستىلەۋىنەن وتەدى. ولاردى دايارلاۋ 4-6 ايدان باستالادى. قىزمەتتەن باسقا پوليسيا يتتەرى تاعى ءبىر ماڭىزدى فۋنكسيانى ورىندايدى.
كينولوگيالىق ورتالىقتاردىڭ يتتەرى اۋتيزم سپەكترى بۇزىلعان بالالارعا ارنالعان كانيستەراپياعا قاتىسادى. بالا ءۇشىن يت موتيۆاتور ءرولىن ورىندايدى: ول ءبۇلدىرشىندى بەلسەندى جۇمىس ىستەۋگە جانە جەتىستىككە جەتۋگە ىنتالاندىرادى. يتپەن قارىم-قاتىناس پسيحيكالىق جانە ەموسيونالدىق قابىلەتتەردىڭ دامۋىنا ىقپال ەتەدى، سونىمەن قاتار قوزعالىس فۋنكسيالارىن جاقسارتادى. 2022 جىلى كينولوگيالىق بولىمشەلەردىڭ قاتىسۋىمەن 6023 قۇقىق بۇزۋشىلىق انىقتالدى، ونىڭ ىشىندە: 2360 ۇرلىق، 188 توناۋ، 26 قاراقشىلىق، 55 كىسى ءولتىرۋ دەرەكتەرى. 473 ودورولوگيالىق زەرتتەۋ جۇرگىزىلدى، ونىڭ ىشىندە 378ء-ى وڭ ناتيجەلى. ولاردىڭ ناتيجەلەرى كوپتەگەن قىلمىستار بويىنشا دالەلدەمەلىك بازاعا ەنگىزىلگەن. سينتەتيكالىق ەسىرتكىلەردىڭ كوپتەپ تارالۋىمەن ماماندارعا قىزمەتتىك يتتەردى وسى زاتتاردى ىزدەۋگە ۇيرەتۋ مىندەتى قويىلدى. حيميك-ماماندار ءيىسى بارلىق سينتەتيكالىق ەسىرتكىلەردە بولاتىن زاتتاردى ءبولىپ الىپ، ءيىس يميتاتورلارىن دايىندادى.
ءقازىر ءار وبلىستا پوليسيادا جاڭا پسيحوبەلسەندى زاتتاردىڭ ءيىسىن انىقتاپ، تابا الاتىن يت بار. كينولوگتار قىزمەتتىك يتتەرىمەن بىرگە ەسىرتكى كونترابانداسى فاكتىلەرىن انىقتاۋ ءۇشىن پوشتا جونەلتىلىمدەرىن تەكسەرۋگە ۇنەمى قاتىسادى. كينولوگ ءۇشىن ءيتتىڭ مىنەز-قۇلقىنداعى كەز كەلگەن وزگەرىستەردى بايقاۋ جانە ونىڭ سيگنالدارىن وڭاي ءتۇسىنۋ وتە ماڭىزدى. وتكەن جىلى ولاردىڭ كومەگىمەن 636 كەلىدەن استام ەسىرتكى، ونىڭ ىشىندە 114 كەلى سينتەتيكالىق ەسىرتكى تاركىلەنىپ، زاڭسىز اينالىمعا جىبەرىلمەدى. كينولوگيالىق قىزمەتتىڭ ارقاسىندا ەسىرتكىنىڭ زاڭسىز اينالىمىنىڭ 900-گە جۋىق فاكتىسىنىڭ جولى كەسىلدى.