دارىگەر ادىلەت زەينەل ءادىل سوت كۇتەتىنىن جازدى، دەپ حابارلايدى aqshamnews.kz
استانادا جارالى ادامدى قۇتقارۋعا ۇمتىلىپ، وپات بولعان جاس فەلدشەر ۇلدانا مىرزۋاننىڭ جۇبايى جانتەبىرەنتەرلىك جازبا جاريالادى. دارىگەر ادىلەت زەينەل وتباسىنا تىلەكشى بولعان حالىققا العىس ءبىلدىردى.
«شاڭىراعىما ءسان، تىرشىلىگىمە ءمان بولدىڭ... ماڭدايىما سىيمادىڭ با، پەرىشتەم، سەن مەنىڭ ماڭگى جۇرەگىمدەسىڭ»، - دەپ جازعان جارىنان ايىرىلعان ول.
دارىگەر ەندىگى جەردە تەرگەۋدىڭ ءادىل ءوتۋىن قالايتىنىن جەتكىزدى.
«ەشقانداي مەدال دا، ەشقانداي ءسوز دە مەنىڭ جۇرەگىمنىڭ يەسىن ماعان قايتارا المايدى. ۇيىمە نۇر، قۇت جانە بەرەكە اكەلگەن، اللا قوسقان ادال جارىمنىڭ تىلەۋىن تىلەگەن بۇكىل قازاق ەلىنە العىسىم شەكسىز. وسى ۋاقىتقا دەيىن اللادان جۇرەگىمدى امان الىپ قالۋىن سۇراپ، قاسىندا بولىپ، دۇعا ەتتىم. سابىر ساقتاپ، ءبارىن سابىرعا سالدىم. ەندىگى تىلەگىم سوتتىڭ ءادىل ءوتۋى، تەرگەۋدىڭ تازا جۇرگىزىلۋى. قۇداي قوسقان قوساعىمنىڭ جانى تىنىش بولۋى ءۇشىن بۇل ءىستى سوڭىنا دەيىن جەتكىزۋىم كەرەك. جاۋاپتىلار جازاسىن الۋى ءتيىس!»، - دەدى ول.
كەشە ۇلدانا مىرزۋان اۋىر جاراقاتتان ايىقپاعان كۇيى اۋرۋحانا توسەگىندە قايتىس بولدى. مارقۇم «ەرلىگى ءۇشىن» مەدالىمەن ماراپاتتالدى.
8 قاراشا كۇنى استاناداعى تاۋەلسىزدىك داڭعىلىندا ورنالاسقان تۇرعىن ءۇيدىڭ كىرپىش قاسبەتى مەن كونديسيونەرى وپىرىلىپ ءتۇسىپ، بەس ادام زارداپ شەككەن ەدى. جاراقات العاندار اراسىندا جەدەل جاردەم قىزمەتىنىڭ فەلدشەرى ۇلدانا مىرزۋان دا بولعان. ول وقيعا ورنىندا زارداپ شەككەندەرگە كومەك كورسەتىپ جاتقان كەزدە ۇستىنە ەكىنشى قاباتتاعى كونديسيونەر قۇلاپ كەتكەن.