بيىل قىزمەتتىك يتتەردىڭ كومەگىمەن ۇلتتىق ۇلاننىڭ اسكەري جاساقتارى 3164 تاپسىرمانى ورىندالعان
ۇلتتىق ۇلاننىڭ ەلوردا ىرگەسىندەگى 5573 اسكەري بولىمىندە كينولوگ-مامانداردىڭ اراسىندا قىزمەتتىك يتتەردىڭ قاتىسۋىمەن جەكە-كوماندالىق بىرىنشىلىك ءوتتى، دەپ حابارلايدى Almaty-akshamy.kz Baq.kz اگەنتتىگىنە سىلتەمە جاساپ.
جارىسقا ۇلتتىق ۇلاننىڭ ءار وڭىرىنەن كەلگەن كوماندالار قاتىستى. 4 كۇنگە سوزىلعان جارىستىڭ جەڭىمپازدارى سالتاناتتى تۇردە ماراپاتتالدى.
سوڭعى ۋاقىتتا قىزمەتتىك يتتەردى قوعامدىق ءتارتىپتى جانە ماڭىزدى مەملەكەتتىك نىسانداردى قورعاۋعا پايدالانۋ كەزەڭ-كەزەڭمەن جۇزەگە اسىرىلۋدا. جارىلعىش زاتتار مەن ەسىرتكىنى ىزدەۋ قىزمەتى دامۋدا. ارنايى ماقساتتاعى بولىمشەلەردە شابۋىلداۋشى يتتەر كەڭىنەن قولدانىلىپ كەلەدى.
2021 جىلى قىزمەتتىك يتتەردىڭ كومەگىمەن ۇلتتىق ۇلاننىڭ اسكەري جاساقتارىمەن 3164 تاپسىرما ورىندالدى. قىزمەتتىك جاۋىنگەرلىك تاپسىرمالاردى ورىنداۋدا ساققۇلاقتار 112 مارتە ناتيجەلى قولدانىلدى. 9 رەت قىلمىستىڭ بەتىن اشسا، 80 قۇقىق بۇزۋشىنى قولعا ءتۇسىردى.
جارىس بارىسىندا ۇلتتىق ۇلاننىڭ وڭىرلىك قولباسشىلىقتارىنان كەلگەن كينولوگتار مەن قىزمەتتىك يتتەر وزدەرىنە جۇكتەلگەن تاپسىرمالاردى تىڭعىلىقتى ورىنداپ شىقتى. بارلىعى ءوز ىستەرىنىڭ شەبەرى ەكەنىن تاعى ءبىر مارتە دالەلدەپ شىقتى. جەكە بىرىنشىلىكتە جىلدام ىزدەۋ بويىنشا 5573 اسكەري ءبولىمىنىڭ كينولوگ-مامانى سەرجانت ايدىن قادىربەك ۇلى «الدونا» قىزمەتتىك يتىمەن جەڭىمپاز اتانسا، جارىلعىش زاتتاردى ىزدەستىرۋ بويىنشا 5573 اسكەري ءبولىمىنىڭ كينولوگ-مامانى ەفرەيتور كۋانىش سەيدالييەۆ «اكيرا» قىزمەتتىك يتىمەن ۇزدىك شىقتى، ال ەسىرتكى زاتتاردى ىزدەۋ بويىنشا ءبىرىنشى ورىنعا «شىعىس» وڭىرلىك قولباسشىلىعىنا قاراستى 5518 اسكەري ءبولىمىنىڭ كينولوگ-مامانى سەرجانت رۋسلان رايسوۆ «بالۋ» قىزمەتتىك يتىمەن جايعاستى.
كوماندالىق ەسەپتە 5573 اسكەري ءبولىمىنىڭ قۇراماسى جەڭىمپاز اتانسا، ەكىنشى ورىنعا «شىعىس» وڭىرلىك قولباسشىلىعى جايعاستى، ال ءۇشىنشى ورىندى «باتىس» وڭىرلىك قولباسشىلىعىنىڭ قۇراماسى مىسە تۇتتى. جارىستىڭ جابىلۋ سالاناتىندا جەڭىمپازدار مەن جۇلدەگەرلەر ۇلتتىق ۇلان باس قولباسشىسىنىڭ كۋبوگى مەن گراموتالارىمەن ماراپاتتالدى.
«جارىس وتە تارتىستى ءوتتى. بۇل كينولوگتار مەن قىزمەتتىك يتتەردىڭ دارەجەسى تەڭ ەكەنىن كورسەتسە كەرەك. تاجىريبە كورسەتىپ وتىرعانداي، بۇل كۇندەرى قىزمەتتىك يتتەر جاۋىنگەرلىك قىزمەت بارىسىندا كەڭىنەن قولدانىلادى. سوڭعى كەزدەرى ءبىزدىڭ ماماندار قىزمەتتىك يتتەرىمەن ارىس پەن بايزاق ەلدى مەكەنىندە ورىن العان تەحنوگەندىك سيپاتتاعى تج زاردابىن جويۋدا جارىلماعان زاتتار مەن جوعالعان ادامداردى ىزدەستىرۋدە تاپسىرمالار ورىندادى»، - دەدى ۇلتتىق ۇلان باس قولباسشىلىعى جاۋىنگەرلىك قىزمەت باس باسقارماسىنىڭ باستىعى پولكوۆنيك يۋريي ماليسكيي.