ەسكەرتكىشتىڭ اتاۋى «تىرشىلىك اعاشى»
ۋكراينانىڭ حاركوۆ قالاسىندا ۇلى اقىن ابايدىڭ ەسكەرتكىشى ورناتىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ەسكەرتكىش «ويشىلدار اللەياسىندا» تريپتيح رەتىندە ورناتىلعان. ەسكەرتكىشتىڭ اۆتورى ۋكراينانىڭ حالىق سۋرەتشىسى سەيفۋتدين گۋربانوۆتىڭ ايتۋىنشا، بۇل ەڭبەكتىڭ اتاۋى «تىرشىلىك اعاشى». تريپتيحتە ابايمەن بىرگە ۋكراينانىڭ حالىق اقىنى گريگوريي سكوۆورود مەن ازەربايجان اعارتۋشىسى، فيلوسوف مىرزا فاتالي احۋندوۆ بەينەلەنگەن. ەسكەرتكىشتىڭ بيىكتىگى - 4 مەتر. اللەيا اۋدانى - 2 543 شارشى مەتر.
ساياباق حاركوۆتاعى تابيعاتى ادەمى تانىمال دەمالىس ايماعىندا ورنالاسقان. قازاقستاننىڭ ۋكرايناداعى ەلشىسى دارحان كالەتايەۆ قالا اكىمشىلىگىنە جاقسى باستاماسى ءۇشىن العىس ايتتى. ول تريپتيح باۋىرلاس ەلدەر اراسىنداعى رۋحاني بايلانىسىن تەرەڭدەتە تۇسەتىنىن، ولاردىڭ مادەنيەتى مەن ونەرىنىڭ كەڭىنەن تانىلۋىنا مۇمكىندىك بەرەتىنىن اتاپ ءوتتى.
ەسكەرتكىشتى ورناتۋ جونىندە باستاماشىنىڭ ءبىرى قازاقستاننىڭ حاركوۆتاعى قۇرمەتتى كونسۋلى ەمين ءنادجافليدىڭ ەڭبەگى ايرىقشا اتاپ ءوتتى.
«ءبىز بۇل ەسكەرتكىشتى ۋكراينالىق باۋىرلاستاردىڭ قازاق حالقىنا، قازاقستاننىڭ تاريحى مەن رۋحانياتىنا شەكسىز قۇرمەت دەپ قابىلدايمىز»، - دەدى ەلشى.
ايتا كەتەرلىگى، قازاقستان پەن ۋكراينا اراسىنداعى ەكونوميكا جانە مادەني بايلانىس جاڭا دەڭگەيگە كوتەرىلىپ، ەرەكشە قارقىن الا تۇسكەن. قازاقستان ەلشىسى د.كالەتايەۆ، قازاقستاننىڭ قۇرمەتتى كونسۋلى ەمين نادجافلي، ەسكەرتكىش اۆتورى سەيفۋتدين گۋربانوۆ تۇرىكسوي تۇركىتىلدەس ەلدەردىڭ مادەنيەتى مەن ونەرىن بىرلەسىپ دامىتۋ جونىندەگى حالىقارالىق ۇيىمىنىڭ «اباي» مەدالىمەن ماراپاتتالدى.