الاياقتىق ءۇشىن سوتتالعان ازامات ۋكراينادان قازاقستانعا ەكستراديسيالاندى
ۋكراينانىڭ ادىلەت مينيسترلىگى قازاقستان سوتىنىڭ ۇكىمىن ورىنداۋدان جالتارعان ازامات «م» قازاقستان رەسپۋبليكاسىنا بەرۋ تۋرالى شەشىم قابىلدادى، دەپ حابارلايدى almaty-akshamy.kz باس پروكۋراتۋرانىڭ باسپا ءسوز قىزمەتىنە سىلتەمە جاساپ.
سوت اتالعان ازاماتتى 2017 جىلى اسا ءىرى مولشەردە الاياقتىق جاساعانى ءۇشىن كىنالى دەپ تانىپ، شارتتى مەرزىمگە سوتتادى. 2019 جىلى «م» ازاماتى سوتتىڭ وزىنە جۇكتەگەن شەكتەۋلەرىن بۇزىپ، جازاسىن وتەۋدەن جالتارۋ ماقساتىندا جاسىرىنىپ، ىزدەۋگە جاريالاندى.
اعىمداعى جىلدىڭ تامىز ايىندا ىزدەۋدە جۇرگەن ادامدى ۋكراينا اۋماعىندا وسى ەلدىڭ قۇقىق قورعاۋ ورگاندارى ۇستادى.
بۇگىن قازاقستان رەسپۋبليكاسىنىڭ ۋكرايناداعى، مولدوۆاداعى جانە تۇركياداعى ەلشىلىكتەرىنىڭ قولداۋىمەن قازاقستان باس پروكۋراتۋراسى مەن ينتەرپول قىزمەتكەرلەرى ونى ءبىزدىڭ ەلگە ەكستراديسيالادى.
قازىرگى ۋاقىتتا ول استانا قالاسىنىڭ تەرگەۋ يزولياتورىنا قامالدى.