ۇلى وتان سوعىسىنا كەتكەن جەرلەستەرىمىزدىڭ سۇيەگى تابىلىپ جاتىر
ەكىنشى دۇنيەجۇزىلىك سوعىس كەزىندە قازا بولعان جۇزدەن استام قازاقستاندىق جاۋىنگەردىڭ سۇيەك قالدىقتارى حاركوۆ وبلىسىنان تابىلدى، دەپ حابارلايدى Almaty-akshamy.kz Qazaqtv.com cايتىنا سىلتەمە جاساپ.
ساراپشىلار ولاردى 1942 جىلى وسى ايماقتا قاندى قاقتىعىس كەزىندە ەرلىكپەن كوز جۇمعان «106-شى اقمولا» اتتى اسكەري ديۆيزيانىڭ ساربازدارى بولۋى مۇمكىن دەپ وتىر.
قازىرگى تاڭدا حاركوۆتا ەلىمىزدىڭ ارنايى ىزدەستىرۋشىلەر توبى جۇمىس ىستەپ جاتىر. 5 جىلدان استام وسى وڭىردە ىزدەۋ جۇمىستارىن جۇرگىزىپ كەلە جاتقان ۋكراينالىق ارىپتەستەر 500-گە جۋىق اسكەردىڭ سۇيەگىن قازىپ العان ەكەن. دەگەنمەن ءالى كۇنگە دەيىن مارقۇمداردىڭ ەسىمدەرى انىقتالماعان.
سونداي-اق، ۋكراينا تۇبىندە ۇرىسقا قاتىسقان كوپتەگەن جاۋىنگەردىڭ ۇرپاقتارى بۇگىندە اقمولا وبلىسىندا تۇرادى. ولار اتا-بابالارىنىڭ مايىتتەرىن تۋعان جەرىنە الىپ كەلىپ، قايتا جەرلەۋگە بولادى دەپ ۇمىتتەنىپ وتىر. سونىمەن قاتار بۇل ەكسپەديسيا ۋكراينادا جۇرگىزىلگەن ەلىمىزدىڭ تاريحي-مۇراعاتتىق جوباسىنىڭ ءبىرىنشى كەزەڭى بولماق.
«ىزدەۋ جۇمىستارى كەزىندە اۋقىمدى ءىستىڭ ءبىر عانا بولىگىن قامتىدىق. نەگىزگى جۇمىستىڭ وزەگىنە ءالى جەتكەن جوقپىز. 350 اسكەر عانا ەمەس، ون مىڭداعان ادامنىڭ سۇيەگى جاتىر. سولاردىڭ جەكە زاتتارىنان باستاپ كىم ەكەنىن انىقتاۋىمىز قاجەت. الداعى ۋاقىتتا ۋكراينالىق ارىپتەستەرىمىزبەن بىرىگىپ مەموريالدى ايماق قۇرعىمىز كەلەدى»، - دەدى «مەموريالدى ايماق» ىزدەۋ جاساعىنىڭ كومانديرى مايدان قۇسايىنوۆ.