بيۋدجەتتەن قارجىلاناتىن مادەنيەت جانە تەحنيكالىق سالا قىزمەتكەرلەرىنىڭ ەڭبەكاقىسى الداعى ءۇش جىل اياسىندا ورتا ەسەپپەن 20% ارتتىرىلادى.
الماتى قالاسى ءماسليحاتىنىڭ حاتشىسى ستانيسلاۆ كانكۋروۆ قازاقستان پرەزيدەنتىنىڭ جولداۋىنا بايلانىستى ءوز پىكىرىن ءبىلدىردى، دەپ حابارلايدى Almaty-akshamy.kz
بۇگىن مەملەكەت باسشىسى قاسىم-جومارت توقايەۆ قازاقستان حالقىنا ارنالعان جولداۋىن جاريالادى. كەلەشەك دامۋدىڭ نەگىزگى باعىتتارى ايقىندالىپ، مەملەكەتىمىزدەگى وزەكتى پروبلەمالار جان-جاقتى ساراپتالدى جانە ولاردى ەڭسەرۋدىڭ جولدارى بەلگىلەندى. وسى رەتتە جولداۋداعى ساياسي رەفورمالارعا توقتالىپ ءوتۋدى ءجون كوردىم.
قازاقستان تاۋەلسىزدىك العان ساتتەن بەرى ەلباسى ن.ءا.نازاربايەۆتىڭ باستامالارىمەن مەملەكەتتىك باسقارۋ، سايلاۋ، ازاماتتاردىڭ قۇقىقتارىن جۇزەگە اسىرۋ بويىنشا كەشەندى رەفورمالاردى تۇراقتى تۇردە جۇزەگە اسىرىپ كەلدى جانە بۇل كەشەندى جۇمىستار قازىرگى ۋاقىتتا دا جالعاسىن تابۋدا. ماسەلەن، جولداۋ اياسىندا ساياسي جاڭعىرتۋ جانە دەموكراتيا قاعيداتتارىن كەڭەيتۋ بويىنشا ەكى جىل بارىسىندا كوپتەگەن وڭ وزگەرىستەر ەنگىزىلگەندىگى تىلگە تيەك ەتىلدى. ساياسي پارتيالاردىڭ ماجىلىسكە ءوتۋ كورسەتكىشى 5%-عا دەيىن ازايتىلدى. سايلاۋ بيۋللەتەندەرىنە «بارىنە قارسى» باعانى ەنگىزىلدى.
وسىمەن قاتار جاڭا جولداۋدا ازاماتتاردىڭ مەملەكەتتى باسقارۋ ىسىنە كەڭىنەن ارالاسۋىن قامتاماسىز ەتىپ، مەملەكەتتىك اپپارات جۇمىسىنىڭ تيىمدىلىگىن ارتتىرۋعا نازار اۋدارىلدى. كورىپ وتىرعانىمىزداي ساياسي رەفورمالار جۇيەلى جالعاسىن تابۋدا. بۇل باستامالار حالىق يگىلىگى ءۇشىن جاسالىپ جاتىر. وسى رەتتە اۋىل اكىمدەرىن تىكەلەي سايلاۋ اسا ماڭىزدى قادام بولدى. پرەزيدەنت ايتىپ وتكەندەي، بۇل - ءادىل ءارى وزىق مەملەكەت قۇرۋدىڭ بىردەن-بىر دۇرىس جولى. 2024 جىلى ازاماتتار پيلوتتىق رەجيمدە اۋدان اكىمدەرىن سايلاۋعا مۇمكىندىك الاتىن بولادى.
كەلەسى ماڭىزدى ماسەلە جەرگىلىكتى ءوزىن-وزى باسقارۋدا ازاماتتىق مادەنيەتتى دامىتۋ بولدى. وسى رەتتە پرەزيدەنت اكىمشىلىگىنە ازاماتتىق باستامالاردى قولداۋ بويىنشا ءتيىمدى مەحانيزم ازىرلەۋ تاپسىرىلدى. سايلاۋ تىزىمدەرىنە 30% ايەل ازاماتشالار مەن جاستاردىڭ ۇلەسى بويىنشا نورمالار ەنگىزۋ ساياسي پارتيالاردىڭ ءوز جۇمىسىنىڭ بەلسەندىلىگىن ارتتىرۋعا جانە قۇرامدارىن جاسارتۋعا يتەرمەلەدى. كەلەسى كەزەڭدە، ياعني دەپۋتاتتىق مانداتتاردى ءبولۋ اياسىندا بۇل باستاما جالعاسىن تابادى. اتالمىش كۆوتانى دەپۋتاتتىق ماندارتتار بەرۋ اياسىندا زاڭناما تۇرعىسىندا بەكىتۋ تاپسىرىلدى. وسىمەن بىرگە، ەرەكشە قاجەتتىلىكتەرى بار ازاماتتاردى دا جوعارىدا اتالعان كۆوتاعا قوسۋ بويىنشا وتە ورىندى پىكىر ايتىلدى. بۇل - ينكليۋزيۆتىك قاعيداتتارىن كۇشەيتۋدىڭ تاعى ءبىر قادامى.
تاعى ءبىر ماڭىزدى ءجايت - قيىن جاعدايعا تاپ بولعان ازاماتتارعا قولداۋ كورسەتۋ. الداعى ۋاقىتتا الەۋمەتتىك باعدارلامالار اياسىندا كومەككە شىنىمەن مۇقتاج جاندارعا جاردەم كورسەتىلەدى. بۇل ءۇشىن ارنايى الەۋمەتتىك كودەكس ازىرلەنەدى.
جولداۋدا حالىق يگىلىگى جولىنداعى باستامالاردى ەرەكشە اتاپ ءوتۋ كەرەك. ولاردىڭ قاتارىندا مينيمالدى ەڭبەكاقى كولەمىنىڭ ارتتىرىلۋى قاراستىرىلعان. وسىنىڭ ارقاسىندا حالقىمىزدىڭ كىرىسى ارتىپ، ماكروەكونوميكالىق دامۋى كۇشەيەدى. بۇل شارا تىكەلەي 1 ميليوننان استام ادامعا اسەر ەتەدى، ال جانامالى تۇردە بارلىق ەڭبەك ەتىپ كەلە جاتقان ازاماتتارعا وڭ ىقپالىن تيگىزەدى. 6،5 ميلليون جالدامالى قىزمەتكەرلەردىڭ ەڭبەكاقىسىنىڭ ارتۋىنا مەملەكەت تاراپىنان ارنايى ىنتالاندىرۋ شارالارى قابىلدانادى. بۇل اسا ماڭىزدى قادام. وسىمەن بىرگە ميكرو جانە شاعىن بيزنەستىڭ ەڭبەكاقى تولەۋ قورىنا سالىقتىق تولەمدەردى ازايتۋ دا اسا ماڭىزدى شارا بولادى. بۇل كولەڭكەلى تۇردە ەڭبەكتەنىپ جۇرگەن ازاماتتاردىڭ سانىن ازايتۋعا مۇمكىندىك بەرەدى.
بيۋدجەتتەن قارجىلاناتىن مادەنيەت جانە تەحنيكالىق سالا قىزمەتكەرلەرىنىڭ ەڭبەكاقىسىنىڭ الداعى ءۇش جىل اياسىندا ورتا ەسەپپەن 20% ارتتىرىلىپ وتىرۋىن اتاپ وتكىم كەلەدى. بۇل جاعىمدى جاڭالىق ەلىمىزدىڭ 600 مىڭعا جۋىق ازاماتتارىنىڭ الەۋمەتتىك جاعدايىنىڭ نىعايۋىنا زور ۇلەسىن قوسادى. تاعى ءبىر ماڭىزدى ماسەلە - الەۋمەتتىك وسال توپتاعى ازاماتتارعا، بيۋدجەتتىك سالا قىزمەتكەرلەرىنە، جاس وتباسىلار مەن ماماندارعا ارنالعان ءبىرىڭعاي مەملكەتتىك تۇرعىن ءۇي باعدارلاماسى جاساقتالاتىن بولادى.
كورىپ وتىرعانىمىزداي، جولداۋدا حالقىمىزدىڭ ءال-اۋقاتىن نىعايتۋعا ارنالعان اۋقىمدى ماقساتتار مەن مىندەتتەر قاراستىرىلعان.