ق ر پرەمەر-مينيسترىنىڭ ءبىرىنشى ورىنباسارى رومان سكليار قالپىنا كەلتىرۋ جانە تارتىپسىزدىكتەر ناتيجەسىندە كەلتىرىلگەن زالالدى وتەۋ جۇمىستارىنىڭ بارىسىمەن تانىسۋ ماقساتىندا الماتى قالاسى مەن الماتى وبلىسىنا جۇمىس ساپارىمەن باردى.
الماتى قالاسىنىڭ اكىمى ب.ساعىنتايەۆ بۇگىنگى تاڭدا قالادا كولىك قاتىناسى مەن ازىق-تۇلىك كاسىپورىندارى شتاتتىق رەجيمدە جۇمىس ىستەپ تۇرعانىن، جول ينفراقۇرىلىمىن قالپىنا كەلتىرۋ بويىنشا قارقىندى جۇمىستار جۇرگىزىلىپ جاتقانىن مالىمدەدى، دەپ حابارلايدى Almaty-akshamy.kz
27 قالالىق عيماراتتى جوندەۋ-قالپىنا كەلتىرۋ جۇمىستارىن جۇرگىزۋ قاجەت، ونىڭ ىشىندە 10 مەملەكەتتىك جانە جەكە مەنشىك مۇلىك نىساندارى بيۋدجەت قاراجاتى ەسەبىنەن قايتا جاڭارتىلاتىن بولادى.
قالعان 17 نىسانعا كەلتىرىلگەن زالال ۇلكەن ەمەس، ولار بيزنەستىڭ الەۋمەتتىك جاۋاپكەرشىلىگى اياسىندا قالپىنا كەلتىرىلەدى. قالادا 20 قۇرىلىس كومپانياسىنىڭ كۇشىمەن 9 نىساندى تازالاۋ جۇمىستارى جۇرگىزىلدى، 800-گە جۋىق ادام جانە 40 بىرلىكتەن استام ارنايى تەحنيكا تارتىلدى.
سونداي-اق، بەينەباقىلاۋ كامەرالارىن قالپىنا كەلتىرۋ جۇمىستارى جۇرگىزىلۋدە. قازىرگى ۋاقىتتا بۇلىنگەن 587 بەينەباقىلاۋ كامەراسىنىڭ 434ء-ى قالپىنا كەلتىرىلدى. بارلىق بەينەباقىلاۋ كامەرالارىن قالپىنا كەلتىرۋ جۇمىستارى 21 قاڭتاردا اياقتالادى.
سونىمەن قاتار Open Almaty قوعامدىق قابىلداۋى بازاسىندا تارتىپسىزدىكتەردەن زارداپ شەككەن شوب وكىلدەرىنە كەلتىرىلگەن زالالدى وتەۋ ماسەلەلەرى بويىنشا جەدەل جەلى قۇرىلدى. تالدىقورعان قالاسىندا كوميسسيا الماتى وبلىسىنىڭ اكىمى ق. بوزىمبايەۆپەن بىرگە 2 مادەنيەت نىسانىن جوندەۋ جۇمىستارىنىڭ اياقتالۋىن تەكسەردى. مەملەكەتتىك ورگانداردىڭ 5 عيماراتىن قالپىنا كەلتىرۋ باستالدى.
جۇمىسقا 400-دەن استام ادام جانە 14 بىرلىك تەحنيكا تارتىلدى. «اتامەكەن» ۇكپ مالىمەتى بويىنشا وڭىردە 141 كوممەرسيالىق نىسان زارداپ شەككەن. 120-دان استام شوب ۇيىمدارى قالپىنا كەلتىرۋ جۇمىستارىن اياقتاپ، وزدەرىنىڭ نەگىزگى قىزمەتىنە كىرىستى.
الماتى وبلىسى بويىنشا كەلتىرىلگەن زالالدىڭ جالپى سوماسى 16،1 ملرد تەڭگەنى قۇرادى. ر. سكليار وڭىرلەردى قالپىنا كەلتىرۋ جانە ولاردىڭ تىنىس-تىرشىلىگىن جاقسارتۋ بويىنشا قارقىندى جۇمىستى جالعاستىرۋدى تاپسىردى.