ءۇش الەم
ادام عۇمىرى قاراپايىم. تۋىلۋ، ەر جەتۋ، قارتايۋ. ءۇش-اق اۋىز ءسوز. ەش قوسپاسىز، ايتا سالۋعا وڭاي. وسى ۇشەۋ - ءۇش كەزەڭ، ءۇش تاعدىر، ءۇش ءۇمىت. بارلىعى ۇشتەن تۇرادى. بۇعان دەيىندە بۇل تاقىرىپتى قوزعاعانبىز. ءبىراق، اشىپ سيپاتتاي الماي كەلەمىز. بالكىم، ماڭگى قۇپيا شىعار. كىم ءبىلسىن؟!
تەرەڭدەۋ. ءار حالىق ءوزىنىڭ تاريحىن ماداقتايدى. ونى تەرىستەيتىندەر نەكەن-ساياق شىعار. بارىندە باتىر بار، شەجىرەگە باي وقيعالار جەتەرلىك. گرەكتەر افينىسىن، يتالياندىقتار ءريمدى، تۇرىكتەر وسمانلى ءداۋىرىن ماقتايدى. ال جۇڭگو، رەسەيلىكتەردى ايتپاسا دا تۇسىنىكتى. بىلاي قاراعاندا تاريحي وقيعالارعا وتە باي. ءبىزدىڭ اتا-بابالارىمىزدىڭ دا اتان تۇيەگە ارتاتىن مول شەجىرەسى ءالى كۇنگە دەيىن جۇمباق بولىپ تۇر. مىنە، بۇل – تاريح. وتكەن، كەيبىر سىرى وشكەن كەزەڭ. ناق سول شاقتا نە بولعانىن ءبىر جاراتۋشىدان باسقا ەشكىم بىلمەيدى. بىلە دە الماس مۇمكىن!
جىلجۋ. ءبىزدىڭ زامانىمىز بۇرىنعىلار ايتقانداي – «تۇلكى زامان». تازىنىڭ ءالى كەلمەي، السىرەگەندەي كورىنەدى. ءقايتسىن، جۇگىرىپ، سەكىرىپ، شارشاعان شىعار. ءبىراق، سولاي ەكەن دەپ ءتورت تابانداپ جاتىپ الۋعا بولمايدى.
بۇگىنگى قوعام ءۇش بولىككە بولىنگەن. ەسكى كوزقاراستى قۇپتاۋشىلار. زاماناۋي ادىسپەن جۇرۋشىلەر. قيالمەن كۇن كەشەتىندەر. وسى ۇشەۋى بىر-بىرىنە مۇلدە جات. كوزقاراستارى توعىسا قويمايدى. دەسە دە، ءبىر قوعامدا جاساپ جاتقان جايى بار.
قازىرگى ادامدار نەگە، كىمگە يلانارىن بىلمەيتىن سياقتى. اقپاراتتاردىڭ كوپتىگىنەن مي قورىتىپ ۇلگەرمەيدى. قۇددى «ماتريسا» ءفيلمى بولىپ جاتقانداي. ءارى قاراي اركىم ءوزى باعامدار.
قول سوزۋ... ارنايى ءۇش نۇكتە قويدىم. كەسىپ-پىشىپ بولاشاققا بولجام ايتار ءبىز ەمەس. دەسە دە، بولاشاق تا بۇرىنعىداي ساعىم ەمەس. ءتىپتى، قۇپيالىعىنان ايىرىلعانداي. كەلەشەكتە ادامدار مارسقا، گالاكتيكاعا ۇشىپ، جەردەن باسقا جاققا قونىس اۋداراتىنى انىق. بۇعان، ارينە، قولى جەتەتىندەر، اسا اۋقاتتىلار بارادى. سوسىن جاپپاي تەندەنسياعا اۋىسادى. ولار ءۇشىن جەر الەمنىڭ قىزىعى تۇگەسىلگەنى قاشان؟ الداعى 5-10 جىلدا اسپاندا جەڭىل كولىكتەر ۇشاتىن سياقتى. ادامدار تىلدەسۋدى اڭسايدى-اۋ. ءبىراق، سويلەسەتىن ادام جوق. سەبەبى، ءبارى ۆيرتۋالدى الەمگە ءوتىپ كەتكەن. سوندىقتان، ارنايى مۇڭ-شەر تىڭدايتىندار كوپتەپ پايدا بولادى. ولاردىڭ قىزمەتى اقىلى بولماق. روبوتتار جايلى ايتۋدىڭ ءوزى ءبىر بولەك اڭگىمە. ولار ادامنىڭ باسقارىلۋىنان شىعىپ كەتۋى دە عاجاپ ەمەس. ەلەكتروندى جۇيەدەن اقاۋ شىقسا، ارعىسىن بىلمەدىم! الەمنىڭ تىم دامىعان ەلدەرىندە ادام كاپيتالى ازايىپ، كەنجە دامۋشىلاردا ءالى دە تۋۋ كورسەتكىشى باسىمداۋ بولماق. بالكىم، ءبارى بىرنەشە جەردەن عانا باسقارىلاتىن شىعار. بارلىق ادامزات بىر-بىرىمەن ارالاسىپ-قۇرالاسىپ كەتۋى مۇمكىن. وتكەن ۇمىت بولماق. مۇنى جاھاندانۋ دەيدى.
ءتۇيىن. ءبىر ۋاقىتتاردا ءۇندىستان كوسەمى بولعان ماحاتما گاندي «بولاشاعىڭنىڭ وزگەرۋىن قالاساڭ، سول وزگەرىستى تاپ ءقازىر جاسا» دەپتى. ءار ءساتتىڭ ءوز ءقادىرى بار. باستىسى، جوعارىدا ايتىلعان ويلاردى ءبىر ارناعا توعىستىرعاندا وسىعان سايادى. جاقسىلىقتان ءۇمىتىمىز ءاردايىم زور. سوعان تالپىنايىق!