ۇكىمەت زارداپ شەككەن كاسىپكەرلەرگە كەلتىرىلگەن شىعىندى وتەيدى

جەكەلەگەن وڭىرلەردەگى تارتىپسىزدىكتەر سالدارىنان كەلتىرىلگەن زالالدى جويۋ ماسەلەلەرى جونىندەگى ۇكىمەتتىك كوميسسيا شوب وكىلدەرىنە كەلتىرىلگەن شىعىندى وتەۋ تەتىگىن بەكىتتى

ۇكىمەت رەزەرۆىنىڭ قاراجاتى كاسىپكەرلىك سۋبەكتىلەرىنە تولەم جاساۋ ءۇشىن جەرگىلىكتى اتقارۋشى ورگاندارعا جىبەرىلەدى، دەپ حابارلايدى Almaty-akshamy.kz

جىلجىمايتىن، جىلجىمالى مۇلىك بويىنشا، سونداي-اق جوعالعان (ۇرلانعان) تاۋارلىق-ماتەريالدىق قۇندىلىقتار بويىنشا كەلتىرىلگەن زالال وتەلەدى. زاقىمدالعان جىلجىمايتىن مۇلىكتىڭ ورنىن تولتىرۋ بەكىتىلگەن سمەتالىق قۇجاتتاما نەگىزىندە جۇزەگە اسىرىلادى.

بۇلىنگەن نەمەسە جويىلعان جىلجىمالى مۇلىك جانە تاۋارلىق-ماتەريالدىق قۇندىلىقتار بويىنشا وتەۋ اكىمدىك جانە/نەمەسە «كۇشىمىز بىرلىكتە» زارداپ شەككەن بيزنەستى قولداۋ قورى ايقىندايتىن باعالاۋ جانە اۋديتورلىق كومپانيالار دايىنداعان باعاعا سايكەس جۇرگىزىلەتىن بولادى.

جوعالعان (ۇرلانعان) تاۋارلىق-ماتەريالدىق قۇندىلىقتار بويىنشا وتەۋ سوماسى راستايتىن قۇجاتتاردىڭ نەگىزىندە، ال ولار بولماعان جاعدايدا – كاسىپكەرلىك سۋبەكتىسىنىڭ 2021 جىلعى ورتاشا ايلىق اينالىمى تۇرىندە ايقىندالادى. جوعالعان نەمەسە بۇلىنگەن مۇلىكتىڭ قۇنىن وتەۋ ءۇشىن «InfoKazakhstan.kz» پلاتفورماسىندا ءتيىستى ءوتىنىش بەرۋ كەرەك.

زالالدى باعالاۋدى جانە وتەلەتىن قۇننىڭ مولشەرىن ايقىنداۋدى مۇلىككە كەلتىرىلگەن زياندى انىقتاۋ جونىندەگى وڭىرلىك كوميسسيالار جانە «كۇشىمىز بىرلىكتە» قورىنىڭ وتىنىمدەرىن قاراۋ جونىندەگى كوميسسيالار جۇرگىزەدى. كاسىپكەرلەردىڭ وتىنىشتەرى 5 كۇنتىزبەلىك كۇن ىشىندە قارالادى، ماقۇلدانعان جاعدايدا ءتيىستى قاراجات ءوتىنىش بەرۋشىگە اۋدارىلادى. كاسىپكەرلەرگە بيىلعى اقپان ايىنان باستاپ تولەم جاساۋ جوسپارلانعان.