بارلىق قوڭىراۋلار جاسىرىن تۇردە قابىلدانادى.
ازاماتتىق باستامالاردى قولداۋ ورتالىعىنداعى سىبايلاس جەمقورلىققا قاتىستى قۇقىق بۇزۋشىلىق ماسەلەلەرى بويىنشا سەنىم تەلەفونىنىڭ نومىرىنە ۇكىمەتتىك ەمەس ۇيىمداردىڭ وكىلدەرى دە، كونكۋرس جەڭىمپازدارىن انىقتايتىن ساراپتاما كوميسسياسىنىڭ مۇشەلەرى دە ءوز شاعىمدارىن تۇسىرە الادى، دەپ حابارلايدى Almaty-akshamy.kz ورتالىقتىڭ باسپا ءسوز قىزمەتىنە سىلتەمە جاساپ.
ازاماتتىق باستامالاردى قولداۋ ورتالىعىندا ۇەۇ-عا مەملەكەتتىك گرانتتاردى ۇسىنۋ جونىندەگى كونكۋرستىق كوميسسيانىڭ قۇرامىنداعى ساراپشىلاردىڭ قۇقىقتارى مەن مىندەتتەرىن تۇسىندىرۋگە ارنالعان ونلاين-كەزدەسۋ ءوتتى.
ءىس-شاراعا ساراپشىلار، ق ر اقپارات جانە قوعامدىق دامۋ مينيسترلىگىنىڭ، «ادالدىق الاڭى» جوبالىق كەڭسەسىنىڭ جانە ازاماتتىق باستامالاردى قولداۋ ورتالىعىنىڭ وكىلدەرى قاتىستى.
ازاماتتىق باستامالاردى قولداۋ ورتالىعىنىڭ باسقارما ءتورايىمى ليما دياستىڭ ايتۋىنشا، ورتالىق ۇەۇ-عا مەملەكەتتىك گرانتتار ۇسىنۋ كونكۋرسىنىڭ جەڭىمپازدارىن انىقتايتىن ساراپتامالىق كوميسسيا مۇشەلەرىنىڭ قۇزىرەتىن ارتتىرۋ ماسەلەلەرىنە ەرەكشە كوڭىل بولەدى.
«ءبىز ساراپتامالىق كوميسسيا مۇشەلەرىنىڭ جۇمىسى جاۋاپكەرشىلىكتى، ارنايى ءبىلىم مەن داعدىلاردى تالاپ ەتەتىنىن تۇسىنەمىز. سونىمەن قاتار، بيىل بايقاۋ كوميسسياسىنىڭ قۇرامىنا العاش كىرگەن ساراپشىلار دا بار. ولاردىڭ قۇزىرەتتىلىگىن ارتتىرۋ ماقساتىندا جىل بويى ءبىز ترەنينگتەردى، سەمينارلاردى وتكىزىپ، ۇەۇ-نىڭ وتىنىمدەرىن باعالاۋ راسىمدەرىن تۇسىندىرەتىن بولامىز»، - دەپ اتاپ ءوتتى ورتالىقتىڭ ءتورايىمى.
سونداي-اق، ليما دياستىڭ مالىمەتتەرىنە سۇيەنسەك، ۇكىمەتتىك ەمەس ۇيىمداردىڭ وتىنىمدەرىن قاراۋ كەزىندە سىبايلاس جەمقورلىق فاكتىلەرىنە جول بەرمەۋ ماقساتىندا ورتالىقتا سىبايلاس جەمقورلىققا قارسى كومپلەانس-قىزمەتتىڭ جۇمىسى جانداندىرىلعان.
«بۇگىن ءبىز ورتالىقتىڭ سىبايلاس جەمقورلىققا قارسى كومپلەانس-قىزمەتىنىڭ جۇمىسىن كۇشەيتۋدەمىز. بىزدە سەنىم تەلەفونى جۇمىس ىستەيدى. 8 771 348 83 84 ءنومىرى ارقىلى وتىنىشتەر مەن شاعىمداردى ساراپتاما كوميسسياسىنىڭ مۇشەلەرى دە، ءوتىنىش بەرۋشىلەر دە جىبەرە الادى. ۇەۇ وكىلدەرى ءوز قۇقىقتارى بۇزىلعان جاعدايدا ساراپتاما كوميسسياسىنا شاعىمدانسا، ساراپشىلار ءوتىنىش بەرۋشىگە وزدەرىنە قىسىم جاساعانى ءۇشىن بىزگە حابارلاسا الادى. بارلىق قوڭىراۋلار جاسىرىن تۇردە قابىلدانادى»، - دەدى ول.
ەسكە سالايىق، وتكەن اپتادا ازاماتتىق باستامالاردى قولداۋ ورتالىعىندا ۇەۇ-عا مەملەكەتتىك گرانتتاردى ۇسىنۋ جونىندەگى 2022 جىلعى كونكۋرستىڭ ساراپتامالىق كوميسسياسىن قۇرۋ ءراسىمى وتكىزىلگەن بولاتىن.