ۇكىمەتتە مەملەكەت باسشىسىنىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى سيفرلىق وزگەرىستەر ارقىلى شەشۋ» اتتى قازاقستان حالقىنا جولداۋى اياسىندا ءتۋريزمدى دامىتۋ جونىندەگى جۇمىستار قارالدى.
پرەمەر-مينيستردىڭ ورىنباسارى ەرمەك كوشەربايەۆ ورتالىق مەملەكەتتىك ورگاندار مەن وڭىرلەردىڭ وكىلدەرىمەن كەڭەس وتكىزدى. كەزدەسۋ بارىسىندا تۋريزم ماسەلەلەرى جانە تۋريستىك ايماقتاردىڭ جاعدايى بويىنشا پرەزيدەنتتىڭ تاپسىرمالارىن جۇزەگە اسىرۋ تۋرالى ەسەپتەر تىڭدالدى. سونىمەن قاتار ەلدىڭ نەگىزگى تۋريستىك دەستيناسيالارىنا جاسالعان ءىس ساپارلاردىڭ ناتيجەلەرى ۇسىنىلدى. ەرمەك كوشەربايەۆ قابىلدانىپ جاتقان شارالاردىڭ جەتكىلىكسىز ەكەنىن ايتىپ، ينفراقۇرىلىمدى دامىتۋ مەن تۋريستىك نىساندارداعى كورسەتىلەتىن قىزمەتتەردىڭ ساپاسىن ارتتىرۋ جۇمىستارىن جەدەلدەتۋدىڭ ماڭىزدىلىعىن ەرەكشە اتاپ ءوتتى. مەملەكەت باسشىسىنىڭ جاڭا تاپسىرمالارىن ەسكەرە وتىرىپ، الداعى جازعى ماۋسىمعا كۋرورتتىق ايماقتاردى دايارلاۋعا باسا نازار اۋدارىلدى.
«ءتۋريزمدى دامىتۋ – بۇل تەك قانا ەكونوميكالىق ۇلەس ەمەس، سونىمەن قاتار قازاقستاننىڭ حالىقارالىق ءيميدجىن نىعايتۋدىڭ، ينۆەستيسيالىق تارتىمدىلىعىن ارتتىرۋدىڭ جانە وڭىرلەردى دامىتۋدىڭ ماڭىزدى فاكتورى. وسى ماقساتتارعا قول جەتكىزۋ ءۇشىن زاماناۋي ينفراقۇرىلىم سالۋمەن قاتار، الەمدىك وزىق تاجىريبەلەرگە سايكەس كەلەتىن جوعارى سەرۆيس ستاندارتتارىن قالىپتاستىرۋ قاجەت»،
– دەپ اتاپ ءوتتى پرەمەر-مينيستردىڭ ورىنباسارى. ۇكىمەت ءتۋريزمدى ۇلتتىق ەكونوميكانىڭ نەگىزگى درايۆەرلەرىنىڭ ءبىرى رەتىندە قاراستىرادى.
ماڭىزدى شارت رەتىندە شاعىن جانە ورتا بيزنەستىڭ بەلسەندى قاتىسۋى، سونداي-اق وتاندىق جانە شەتەلدىك تۋريستەرگە قىزمەت كورسەتۋ ىسىنە حالىقتىڭ كەڭ اۋقىمىن تارتۋ قاجەتتىلىگى اتالدى.
جيىن قورىتىندىسى بويىنشا مەملەكەتتىك ورگاندارعا كۋرورتتىق ايماقتاردىڭ اباتتاندىرۋ ستاندارتتارىن جانە تۋريستەردىڭ قاۋىپسىزدىگىن قامتاماسىز ەتۋ، شەتەلدىك قوناقتار ءۇشىن پاسپورتتىق باقىلاۋ راسىمدەرىن جەڭىلدەتۋ، سۇرانىسقا يە اۋە باعىتتارىنا حالىقارالىق لوۋكوستەرلەردى تارتۋ، سونداي-اق تۋريستىك قىزمەتتەردىڭ ساپاسىن ارتتىرۋعا باعىتتالعان ءبىرقاتار باسقا دا شارالار جۇزەگە اسىرۋ تاپسىرىلدى.