بۇگىن توتەنشە جاعدايلار ءمينيسترى شىڭعىس ءارىنوۆ ۇكىمەتتىڭ ءورت ءقاۋىپتى كەزەڭگە دايىندىق ماسەلەسى جونىندەگى وتىرىسىندا ءسوز سويلەدى.
تج ءمينيسترى حابارلاعانداي، توتەنشە جاعدايلار مينيسترلىگى ءورت ءقاۋىپتى كەزەڭدە حالىقتىڭ جانە ەل اۋماعىنىڭ قاۋىپسىزدىگىن قامتاماسىز ەتۋ ءۇشىن كەشەندى شارالار قابىلداۋدا، دەپ حابارلايدى Almaty-akshamy.kz ق ر تجم-گە سىلتەمە جاساپ.
بولجام بويىنشا، جاز ىستىق بولادى، تابيعي ورتتەردىڭ بولۋ ءقاۋپى جوعارى. ءقازىردىڭ وزىندە، ەلىمىزدە 27 ورمان ءورتى جانە 122 دالا جانۋى تىركەلدى. ولاردىڭ كوپشىلىگى مينيسترلىك كۇشتەرىنىڭ قاتىسۋىمەن، ونىڭ ىشىندە اۆياسيا تارتۋ ارقىلى جويىلدى.
وڭىرلەردە ءورت قاۋىپسىزدىگى بويىنشا پروفيلاكتيكالىق ءىس-شارالار جالعاسۋدا. ورماندى دالا القاپتارى مەن دەمالىس ورىندارىندا ءموبيلدى توپتار رەيدتەر جۇرگىزىپ، ناتيجەسىندە ءورت قاۋىپسىزدىگى ەرەجەلەرىن بۇزعانى ءۇشىن 630 ادامعا ايىپپۇل سالىندى. سونىمەن قاتار، شارۋا قوجالىقتارىن ارالاۋ جۇمىستارى جۇرگىزىلۋدە.
تابيعي ورتتەرگە دەن قويۋ الگوريتمىن پراكتيكالىق پىسىقتاۋ ءۇشىن وتكەن جىلى «ورماندالا-2023» وقۋ-جاتتىعۋى وتكىزىلدى. بيىل 15-16 مامىردا ەلىمىزدىڭ بارلىق وڭىرلەرىندە «ءورت-2024» رەسپۋبليكالىق كوماندالىق-شتابتىق وقۋ-جاتتىعۋ وتكىزىلەدى. وقۋ-جاتتىعۋدى ۇيلەستىرۋ جونىندەگى رەسپۋبليكالىق شتاب اباي وبلىسىنىڭ «سەمەي ورمانى موتر» رمم بورودۋليحا فيليالىنىڭ اۋماعىندا ورنالاسقان. وقۋ-جاتتىعۋ شەڭبەرىندە ەكى كۇن ىشىندە بارلىق وڭىرلەردە پروفيلاكتيكالىق ءىس-شارالار كەشەنى، سونداي-اق ازاماتتىق قورعاۋ قىزمەتتەرىمەن جانە قۇرالىمدارىمەن پراكتيكالىق ءىس-قيمىلدار جۇرگىزىلەدى.
بارلىق وڭىرلەردە ورمان شارۋاشىلىعى مەكەمەلەرىمەن 53 ورت-تاكتيكالىق وقۋ-جاتتىعۋ وتكىزىلدى. مينيسترلىكتىڭ وقۋ ورتالىقتارىندا ورمان كۇزەتىنىڭ 1 300 جۇمىسشىسى وقىدى.
ءار وڭىردە ءىرى ورتتەرمەن كۇرەسۋ ءۇشىن جالپى سانى رەسپۋبليكا بويىنشا شامامەن 50 مىڭ ادام جانە 10 مىڭنان استام تەحنيكادان تۇراتىن كۇشتەر مەن قۇرالدار توپتاماسى دايىندالدى. قازاۆياقۇتقارۋ اۆياسياسىنىڭ 19 بورتى تۇراقتى دايىندىق رەجيمىندە تۇر، ونىڭ 9-ى سۋ توگەتىن قۇرىلعىلارمەن جابدىقتالعان. اەروۆيزۋالدى بارلاۋ ءۇشىن 120 ۇشقىشسىز ۇشۋ اپپاراتى بار.
تج مينيسترلىگى ازاماتتىق قورعاۋ قىزمەتتەرىمەن بىرلەسىپ ەلدەگى ءورت قاۋىپسىزدىگىن قامتاماسىز ەتۋ ءۇشىن قاجەتتى شارالاردى قابىلدايتىن بولادى.
«قازىرگى تاڭدا ەلىمىزدە بولىپ جاتقان سۋ تاسقىنى تجم-نىڭ كەز-كەلگەن قاۋىپ-قاتەرلەرگە دايىن ەكەندىگىن كورسەتىپ جاتىر. ءدال وسى رەجيمدە ءورت ءقاۋىپتى كەزەڭدە بارلىق قاجەتتى ءىس-شارالار ۇيىمداستىرىلاتىن بولادى»، - دەپ تجم باسشىسى اقپاراتتاندىردى.