پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا جىلىتۋ ماۋسىمىنداعى ءورت قاۋىپسىزدىگى ماسەلەسى قارالدى.
توتەنشە جاعدايلار ءمينيسترى شىڭعىس ءارىنوۆ الدىن الۋ جۇمىستارى تۋرالى ايتتى، سونداي-اق ءبىرقاتار ءوڭىر اكىمدەرى بايانداما جاسادى، دەپ حابارلايدى aqshamnews.kz Primeminister.kz-كە سىلتەمە جاساپ.
تجم مالىمەتىنشە، بيىل قازان ايىنىڭ باسىنان بەرى تۇرعىن ءۇي سەكتورىندا ورىن العان 650-دەن استام ءورت تىركەلگەن. نەگىزگى سەبەپتەردىڭ ءبىرى – جىلۋ جۇيەلەرى مەن ەلەكتر قۇرىلعىلارىن پايدالانۋ ەرەجەلەرىنىڭ بۇزىلۋى. شىڭعىس ءارىنوۆ وڭىرلەر بويىنشا قوستاناي، قىزىلوردا جانە اباي وبلىستارىندا ءورتتىڭ كوبەيىپ وتىرعانىن باياندادى.
پرەمەر-مينيستر پروفيلاكتيكالىق جۇمىستى كۇشەيتۋ جانە قاۋىپسىزدىك تالاپتارىنىڭ ساقتالۋىن باقىلاۋ قاجەتتىگىنە نازار اۋداردى.
«جىلۋ بەرۋ كەزەڭىندە ورتتەردىڭ 50%-عا جۋىعى پەشتەر مەن مۇرجالارداعى اقاۋلاردىڭ كەسىرىنەن ورىن الادى. الايدا، ءورتتىڭ نەگىزگى شىعۋ سەبەبى جىلىتۋ پەشتەرى مەن قازاندىقتاردى پايدالانۋ كەزىندە ءورت قاۋىپسىزدىگى ەرەجەلەرىن ورەسكەل بۇزۋ بولىپ وتىر. توتەنشە جاعدايلار مينيسترلىگى وسىعان باسا نازار اۋدارىپ، مۇنداي بۇزۋشىلىقتارعا بەي-جاي قاراماۋعا ءتيىس. تەك ۇسىنىم بەرۋمەن عانا شەكتەلۋگە بولمايدى. ول ءۇشىن گاز-تەحنيكالىق ينسپەكسيانىڭ وكىلەتتىگىن كۇشەيتۋ كەرەك»، — دەپ اتاپ ءوتتى ولجاس بەكتەنوۆ. اكىمدىكتەرگە تجم - مەن بىرلەسىپ تۇرعىن ءۇي سەكتورىندا بارلىق جەردە ءورت قاۋىپسىزدىگى ايلىعىن ۇيىمداستىرۋ جونىندە تاپسىرما بەرىلدى.
پرەمەر-مينيستر حالىقتىڭ الەۋمەتتىك وسال توپتارىن تەگىن گاز داچيكتەرىمەن قامتاماسىز ەتۋ مىندەتىن قويدى. مۇنداي ۇيلەر ەسەپكە الىنىپ، ولار ەرەكشە باقىلاۋ ايماعىندا بولۋى ءتيىس. اسىرەسە جەتىسۋ، اقمولا، اقتوبە وبلىستارىنىڭ جانە الماتى قالاسى اكىمدىكتەرىنىڭ بۇل باعىتتاعى جۇمىستارى ماردىمسىز جۇرگىزىلۋدە – 2%-دان 14%-عا دەيىن عانا قامتىلعان. ولجاس بەكتەنوۆ جۇمىستى كۇشەيتۋدى تاپسىردى.
جارامسىز تۇرمىستىق باللونداردى قولدانىستان شىعارۋ جانە ۋتيليزاسيالاۋ ماسەلەسىن شەشۋ قاجەتتىگى اتاپ ءوتىلدى. ولجاس بەكتەنوۆ اكىمدىكتەرگە جۇكتەلگەن گاز جابدىقتارىن ءقاۋىپسىز پايدالانۋ تالاپتارىنىڭ ساقتالۋىن باقىلاۋ ءتيىستى دەڭگەيدە جۇزەگە اسىرىلمايتىنىنا نازار اۋداردى. گاز تولتىرۋ پۋنكتتەرىنىڭ مەنشىك يەلەرى ءتيىستى ءتۇسىندىرۋ جۇمىستارىن جۇرگىزۋ قاجەت. سونىمەن قاتار پرەمەر-مينيستر ونەركاسىپ مينيسترلىگىنە مۇددەلى مەملەكەتتىك ورگاندارمەن بىرلەسىپ، باللوندار ءوندىرىسىن ۇيىمداستىرۋ بويىنشا شارالار قابىلداۋدى تاپسىردى.
سونىمەن قاتار پرەمەر-مينيستر حالىق اراسىندا قاۋىپسىزدىك مادەنيەتىن ارتتىرۋ بويىنشا ءتۇسىندىرۋ جۇمىستارىن جۇرگىزۋدىڭ ماڭىزدى ەكەنىن اتاپ ءوتتى. وسىعان بايلانىستى توتەنشە جاعدايلار مينيسترلىگىنە ىشكى ىستەر مينيسترلىگى مەن اكىمدىكتەر بىرلەسىپ، جەكە تۇرعىن ۇيلەرگە رەيد جۇرگىزۋدى جانداندىرۋ تاپسىرىلدى. مادەنيەت جانە اقپارات مينيسترلىگىنە جەرگىلىكتى اتقارۋشى ورگاندارمەن بىرلەسىپ بۇقارالىق اقپارات قۇرالدارى مەن الەۋمەتتىك جەلىلەردە پروفيلاكتيكالىق ماتەريالدار تاراتۋ ماسەلەلەرىن پىسىقتاۋ تاپسىرىلدى. توتەنشە جاعدايلار مينيسترلىگى الدىنا جىلۋ بەرۋ كەزەڭىندە ءورتتىڭ الدىن الۋ ماسەلەلەرى بويىنشا مۇددەلى مەملەكەتتىك ورگاندار مەن اكىمدىكتەردى ءتيىمدى ۇيلەستىرۋدى قامتاماسىز ەتۋ مىندەتى قويىلدى.