«باۋىرىنا سالۋ» ءفيلمى فرانسياداعى Cinema Heritage فەستيۆالىندە ارنايى جۇلدەگە يە بولدى.
الەمدىك كينەماتوگرافيالىق مۇرانى ساقتاۋعا جانە ناسيحاتتاۋعا ارنالعان بۇل بەدەلدى فەستيۆالدە تەرەڭ مادەني كونتەكست بار. ءىس-شارا ۇلتتىق كينەماتوگرافيانىڭ دامۋىنا ەلەۋلى ۇلەس قوسىپ، حالىقارالىق اۋديتوريانىڭ نازارىن اۋداردى، دەپ حابارلايدى aqshamnews.kz مادەنيەت جانە اقپارات مينيسترلىگىنە سىلتەمە جاساپ.
ۇيىمداستىرۋشىلار كينوتۋىندىنى جوعارى باعالاپ، ءفيلمدى يۋنەسكو-داعى باسىم باعىت سانالاتىن مادەني ءارالۋاندىقتى ناسيحاتتاۋدا ءمانى زور تۋىندى دەپ تاپقان.
جىل سايىن Cinema Heritage فەستيۆالى الەمدىك كينويندۋستريانىڭ مايتالمان وكىلدەرىن جيناپ، ۇزدىكتەردى انىقتايدى. وسى ماڭىزدى شارادا قازاقستاندىق ءفيلمنىڭ ەلەنۋى قازاقستاندىق كينو ءوندىرىسىنىڭ دەڭگەيى مەن الەمدىك كينەماتوگرافياداعى ورنىن كورسەتەدى.
فيلم مادەنيەت جانە اقپارات مينيسترلىگى مەن «ۇلتتىق كينونى قولداۋ ورتالىعىنىڭ» قولداۋىمەن تۇسىرىلگەن.
ايتا كەتەيىك، رەجيسسەر اسحات كۋچينچەرەكوۆ تۇسىرگەن «باۋىرىنا سالۋ» ءفيلمى ەلىمىزدىڭ اتىن حالىقارالىق ارەنادا تانىستىرۋ ءۇشىن «وسكار» كوميتەتىنە ۇسىنىلدى.