بيۋدجەت پارامەترلەرىن پىسىقتاۋدى تاپسىردى
ق ر پرەمەر-مينيسترى ءاليحان سمايىلوۆ ەكونوميكالىق ساياسات جونىندەگى كەڭەستىڭ وتىرىسىن وتكىزدى. وتىرىس بارىسىندا 2023-2027 جىلدارعا ارنالعان الەۋمەتتىك-ەكونوميكالىق دامۋ بولجامىن قالىپتاستىرۋ ماسەلەلەرى تالقىلاندى، دەپ حابارلايدى Almaty-akshamy.kz primeminister.kz سايتىنا سىلتەمە جاساپ.
اتالعان تاقىرىپ بويىنشا ق ر پرەزيدەنتى اكىمشىلىگى باسشىسىنىڭ ءبىرىنشى ورىنباسارى تيمۋر سۇلەيمەنوۆ، پرەمەر-مينيستردىڭ ورىنباسارى – قارجى ءمينيسترى ەرۇلان جاماۋبايەۆ، ۇلتتىق ەكونوميكا ءمينيسترى الىبەك قۋانتىروۆ، ۇلتتىق بانك ءتوراعاسىنىڭ ورىنباسارى اقىلجان بايماعامبەتوۆ جانە تاعى باسقالار ءسوز سويلەدى.
تالقىلاۋدى قورىتىندىلاي كەلە، ءاليحان سمايىلوۆ ۇكىمەت وتىرىسىنا شىعارۋ ءۇشىن ۇلتتىق ەكونوميكا مينيسترلىگىنە مۇددەلى مەملەكەتتىك ورگاندارمەن بىرلەسىپ ەلدىڭ دامۋ بولجامى مەن بيۋدجەت پارامەترلەرىن پىسىقتاۋدى تاپسىردى.