ق ر ۇكىمەت باسشىسى ءاليحان سمايىلوۆتىڭ توراعالىعىمەن وتكەن وتىرىستا وتاندىق تەمىرجول سالاسىنىڭ دامۋىنا قاتىستى ماسەلەلەر قارالدى.
كولىك سالاسىنا جاۋاپتى ءمينيستردىڭ ايتۋىنشا، 2023 جىلدىڭ 10 ايىندا تەمىرجول كولىگىمەن جۇك تاسىمالداۋ كولەمى 200 ملن 46 مىڭ توننانى قۇراپ، 3 پايىزعا ارتقان. جىلدىڭ سوڭىنا دەيىن شامامەن 300 ملن توننا جۇك تاسىمالداناتىن بولادى، دەپ حابارلايدى Almaty-akshamy.kz كولىك مينيسترلىگىنە سىلتەمە جاساپ.
وسى رەتتە تەمىرجول كولىگى ەكونوميكانىڭ ەكسپورتتىق باعىتتاعى قاجەتتىلىكتەرىن تولىق كولەمدە قامتاماسىز ەتەتىنىن ايتا كەتكەن ورىندى. ياعني، جىل باسىنان بەرى ەكسپورتتىق تاسىمالداۋ 70 ملن 700 مىڭ توننانى، ال ءوسىم 8،5 پايىزدى قۇرايدى.
«تەمىرجول كولىگى – ەكونوميكانى دامىتۋدىڭ ماڭىزدى اسپەكتىلەرىنىڭ ءبىرى. بۇگىنگى تاڭدا ەلىمىزدىڭ گەوگرافيالىق ورنالاسۋى ترانزيتتىك الەۋەتتى دامىتۋعا زور مۇمكىندىك بەرىپ وتىر»، - دەدى كولىك ءمينيسترى مارات قارابايەۆ.
ترانزيتتىك تاسىمالدار تۋرالى ايتا كەلە، مارات كارىمجان ۇلى اتالعان تاسىمال ءتۇرى بەلسەندى قارقىنمەن دامىپ كەلە جاتقاندىعىنا باسا نازار اۋداردى. 10 ايدىڭ قورىتىندىسى بويىنشا ترانزيتتىك جۇك تاسىمالداۋ كولەمى 19 پايىزعا ارتقان. ءوز كەزەگىندە كونتەينەرلىك تاسىمالدار دا 15%-عا ۇلعايعان. سونىمەن بىرگە جولاۋشىلاردى تاسىمالداۋ بارىسىندا دا ايتارلىقتاي ءوسىم بايقالادى.
«مەملەكەت باسشىسىنىڭ ەلدىڭ كولىك-لوگيستيكالىق الەۋەتىن دامىتۋ جونىندەگى تاپسىرماسى شەڭبەرىندە، ترانزيتتىك تاسىمالدارعا ەرەكشە نازار اۋدارىلىپ وتىر. كونتەينەرلىك تاسىمالداردىڭ كولەمى وتكەن جىلعى كورسەتكىشتى 2020 جىلمەن سالىستىرعانداعى 29 پايىزعا ارتتى. سوڭعى جىلدارى قىتايدان ەۋروپا جانە كورشىلەس ەلدەرگە قازاقستان ارقىلى جونەلتىلەتىن ترانزيتتىك جۇك كولەمى ەداۋىر ارتىپ، جۇڭگو حالىق رەسپۋبليكاسىنىڭ قازاقستاندىق ترانزيتتىك تاسىمالداۋداعى ۇلەسى 27%-عا دەيىن ۇلعايدى»،- دەپ اتاپ ءوتتى مينيستر.
سالانىڭ اعىمداعى جاي-كۇيى تۋرالى ايتا كەلە، م.قارابايەۆ ۇكىمەت مۇشەلەرىن سالانى ودان ءارى دامىتۋدى كوزدەيتىن الداعى ۋاقىتقا جوسپارلانعان جۇمىستار بارىسىمەن تانىستىرىپ ءوتتى. ونىڭ ىشىندە، شەكارالىق پۋنكتەردى دامىتۋ، ماگيسترالدىق تەمىر جول جەلىلەرىن دامىتۋ (جاڭا جانە ەكىنشى جولداردى سالۋ، توراپتىق ستانسيالاردى جاڭعىرتۋ، تەمىرجولداردى كۇردەلى جوندەۋ)، لوكوموتيۆ جانە جۇك ۆاگوندارىمەن قامتاماسىز ەتۋ، تاريفتىك ساياساتتى جەتىلدىرۋ جانە جولاۋشىلار تاسىمالىنا ارنالعان ۆاگونداردى جاڭارتۋ.
ءمينيستردىڭ ايتۋىنشا، جوعارىدا اتالعان باعىتتاردى جۇزەگە اسىرۋ 2029 جىلعا قاراي ترانزيتتىك تاسىمالدار كولەمىن ايتارلىقتاي ۇلعايتۋعا جول اشادى.
ەل اۋماعىنداعى شەكارالىق پۋنكتىلەردىڭ قۋاتتىلىعىنا توقتالاتىن بولساق، بۇگىندە كورشى بەس ەلمەن 27 تەمىرجول شەكارا پۋنكتەرى ارقىلى بايلانىس ورناتىلعان. ايتا كەتەرلىگى، جۇڭگو باعىتىنداعى ەكى شەكارا پۋنكتىن مودەرنيزاسيالاۋ كوزدەلىپ وتىر. ال دوستىق ستانسياسىنىڭ مودەرنيزاسيالاۋ جۇمىستارى دوستىق – مويىنتى ۋچاسكەسىندە ەكىنشى جولدىڭ قۇرىلىسى شەڭبەرىندە قاراستىرىلىپ وتىر. بۇل شارالار ەكى ستانسيانىڭ وتكىزۋ قابىلەتىن جىلىنا قوسىمشا 14 ملن تونناعا دەيىن ۇلعايتۋعا مۇمكىندىك بەرمەك. سونداي-اق باحتى – تاچەن ءۇشىنشى وتكىزۋ پۋنكتىن اشۋ، داربازا – ماقتاارال تەمىر جول جەلىسىنىڭ قۇرلىسى جوسپارلانىپ وتىر.