ونەرتابىستىڭ ەرەكشەلىگى - ول تاۋكە حان تۇسىندا قازاق حاندىعىندا قابىلدانعان «جەتى جارعى» زاڭىن باياندايدى.
اقتوبە وبلىسى حرومتاۋ قالاسىنداعى №3 ورتا مەكتەپتىڭ التىنشى سىنىپ وقۋشىسى جومارت ازامات ۇلى ويلاپ تاپقان قۇرىلعىسىنىڭ ارقاسىندا تاۋكە حاننىڭ پورترەتىن سويلەتتى، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
وقۋشى پورترەتتى جاساۋدا ءتۇرلى قاجەتتى تەحنيكالىق قۇرالدار مەن اۋديوتاسپالاردى پايدالانعان. جۇمىستى ازىرلەۋگە ءبىر جىل ۋاقىت كەتكەن. پورترەت mp3-قۇرىلعىسىمەن، سەنسورلى ءوشىرۋ تۇيمەلەرىمەن جانە 12 ۆ قۋات كوزىمەن جابدىقتالعان.
جاس ونەرتاپقىش الداعى ۋاقىتتا وزگە دە اقىن-جازۋشىلار مەن تاريحي تۇلعالاردىڭ پورترەتتەرىن سويلەتىپ، سول ارقىلى وسكەلەڭ ۇرپاققا حالىق تاريحىن كەڭىنەن ناسيحاتتاۋدى جوسپارلاپ وتىر.