ۇكىمەت وتىرىسىندا ينفلياسيانىڭ الدىن الۋ شارالارى پىسىقتالدى
ق ر پرەمەر-مينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ينفلياسياعا قارسى ارەكەت ەتۋ جونىندەگى شارالار كەشەنى قارالدى، دەپ حابارلايدى Almaty-akshamy.kz رrimeminister.kz-كە سىلتەمە جاساپ.
ەلىمىزدىڭ ۇلتتىق ەكونوميكا ءمينيسترى اسەت ەرعالييەۆ، ۇلتتىق بانك ءتوراعاسى ەربولات دوسايەۆ، باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى سەرىك جۇمانعارين، اۋىل شارۋاشىلىعى ءبىرىنشى ۆيسە-مينيسترى ايداربەك ساپاروۆ، ساۋدا جانە ينتەگراسيا ۆيسە-مينيسترى ەرجان قازانبايەۆ بايانداما جاسادى. مەملەكەت باسشىسى قاسىم-جومارت توقايەۆتىڭ جولداۋدا ينفلياسيانىڭ وسۋىنە جول بەرمەۋ بويىنشا العا قويعان مىندەتىن ورىنداۋ ماقساتىندا ۇكىمەت قىسقا مەرزىمدى جانە ورتا مەرزىمدى پەرسپەكتيۆاعا ارنالعان ينفلياسياعا قارسى ارەكەت ەتۋ جونىندەگى شارالار كەشەنىن ازىرلەدى.
ازىق-تۇلىك ينفلياسياسىن تەجەۋ جونىندەگى جەدەل شارالار اياسىندا سەكتوردا قۇن بەلگىلەۋدىڭ بۇكىل تىزبەگىندە باعانى تۇراقتاندىرۋ بويىنشا ناقتى شارالار قابىلدانادى. الەۋمەتتىك ماڭىزى بار ازىق-تۇلىك ساتىپ الىنىپ، «ازىق-تۇلىك كەلىسىم شارت كورپوراسياسى» ۇك» اق-نىڭ اۋىل شارۋاشىلىعى ونىمدەرىن قايتا وڭدەۋشىلەر ءۇشىن شيكىزاتتىڭ تۇراقتى جانە بولجامدى باعالارىن قامتاماسىز ەتۋدەگى ءرولى كەڭەيتىلەدى. وندىرۋشىلەرگە جەڭىلدىكپەن كرەديت جانە سۋبسيديا بەرۋ مەحانيزمدەرى كەڭەيتىلىپ، اۋىل شارۋاشىلىعى ونىمدەرىن ساقتاۋ ينفراقۇرىلىمىن سالۋ ءۇشىن سۋبسيديالاۋ نورمالارى ۇلعايتىلادى. الەۋمەتتىك ماڭىزى بار ازىق-تۇلىك تاۋارلارىن ساتۋشىلار ءۇشىن جالداۋ اقىسى تومەندەتىلەدى.
ەلدەگى وندىرۋشىلەردىڭ ءبىرىڭعاي ءتىزىلىمىن جاساۋ جانە باعانى مونيتورينگتەۋ جونىندەگى تالدامالىق پلاتفورمانى ىسكە قوسۋ وڭىرلەردە ينفلياسيانىڭ كۇرت ءوسۋ فاكتىلەرىنە دەرەۋ ارەكەت ەتۋگە مۇمكىندىك بەرەدى. ازىق-تۇلىكتەن باسقا تاۋارلارعا ينفلياسيا دەڭگەيىن تەجەۋ جونىندەگى شارالار اياسىندا قاجەت بولسا، تاپشىلىق ورىن الىپ وتىرعان نەمەسە ىشكى نارىقتا باعاسى وسكەن شيكىزات پەن ماتەريالداردى سىرتقا شىعارۋعا شەكتەۋ ەنگىزۋ كوزدەلەدى. مەديسينالىق قىزمەتتەردىڭ كەشەندى تاريفتەرىن جانە ءبىرقاتار مەديسينالىق تاۋاردىڭ شەكتى باعاسىن الدىن الا بەكىتۋ قامتاماسىز ەتىلەدى.
ينفلياسيا يمپورتىنىڭ جوعارى دەڭگەيى بار وندىرىستەردى ۇلعايتۋ جونىندە ناقتى شارالار قابىلدانادى، ونىڭ ىشىندە قۇرىلىس ماتەريالدارى مەن جەڭىل ونەركاسىپ ونىمدەرى دە بار. اقشا-نەسيە ساياساتىنىڭ اياسىندا ينفلياسياعا قارسى شارالاردى ىسكە اسىرۋعا، ونىڭ ىشىندە ەكونوميكاداعى وتىمدىلىك كولەمىنە باقىلاۋدى كۇشەيتۋ جولىمەن ىسكە اسىرۋعا نازار اۋدارىلاتىن بولادى.
«بۇل شارالاردىڭ ءبارى وسى جىلدىڭ اياعىنا دەيىن ازىق-تۇلىكتەن باسقا تاۋارلار مەن اقىلى قىزمەتتەردىڭ باعاسىن جەدەل تۇردە تۇراقتاندىرىپ، ينفلياسيانىڭ جالپى دەڭگەيىن باقىلاۋعا مۇمكىندىك بەرەدى»، - دەدى ا. مامين.
ۇكىمەت باسشىسى مەملەكەتتىك ورگاندار مەن ۇيىمدارعا، جەرگىلىكتى اتقارۋشى ورگاندارعا كوزدەلگەن شارالاردى ورىنداۋعا دەرەۋ كىرىسۋدى، ۇلتتىق ەكونوميكا مينيسترلىگىنە ولاردىڭ ىسكە اسىرىلۋ بارىسىنا مونيتورينگ جاساۋدى تاپسىردى.