الەۋمەتتىك ماڭىزى بار ازىق-تۇلىك تاۋارلارىنىڭ باعاسى ارزاندادى

ەلدە كارتوپ پەن ءسابىز باعاسى ارزاندادى

سوڭعى ەكى اپتادا الەۋمەتتىك ماڭىزى بار ازىق-تۇلىك تاۋارلارىنىڭ باعاسى 0،5 پايىزعا تومەندەدى. بۇل تۋرالى بۇگىن ۇكىمەت وتىرىسىندا ق ر ساۋدا جانە ينتەگراسيا ۆيسە-مينيسترى ەرجان قازانبايەۆ ءمالىم ەتتى، دەپ حابارلايدى Almaty-akshamy.kz حابار 24 سايتىنا سىلتەمە جاساپ.  

«جىل باسىنان بەرى الەۋمەتتىك ماڭىزى بار ازىق-تۇلىك تاۋارلارىنىڭ باعاسى 9،9 پايىزعا ءوستى. ىشكى نارىقتا وتاندىق ونىمدەردىڭ كوبەيۋى ەسەبىنەن سوڭعى ەكى اپتادا باعالار 0،5 پايىزعا تومەندەدى. اتاپ ايتقاندا، ەڭ جوعارى ءوسۋ ساتىنەن باستاپ كارتوپ باعاسى 34 پايىزعا نەمەسە 71 تەڭگەگە، ال ءسابىز 41 پايىزعا نەمەسە 122 تەڭگەگە تومەندەدى. سونىمەن قاتار، سوڭعى اپتالاردا قىرىققابات 0،4 پايىزعا، پياز 0،1 پايىزعا ارزاندادى»، - دەدى ە.قازانبايەۆ.

ونىڭ ايتۋىنشا، باعانىڭ ەڭ جوعارى ءوسىمى 11،6% - تۇركىستان وبلىسىندا، 11،3% – قىزىلوردا وبلىسىندا جانە 11،3% – قوستاناي وبلىسىندا تىركەلدى. ەڭ تومەن ءوسىم 9،5% – الماتى قالاسىندا، 9،6% – الماتى وبلىسىندا جانە 9،7% – قاراعاندى وبلىسىندا بەلگىلەندى.