ينفلياسيا دەڭگەيىن تومەندەتۋ ماڭىزدى.
قازاقستاندىقتاردىڭ تابىسىن ارتتىرۋعا ارنالعان ارنايى باعدارلاما ازىرلەنىپ جاتىر. بۇل تۋرالى ق ر پرەمەر-مينيسترى ءاليحان سمايىلوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«كاسىپكەرلىكتى دامىتۋ - ۇكىمەتتىڭ 2022 جىلعا ارنالعان ءىس-قيمىل باعدارلاماسىندا ايقىندالعان جاڭا ەكونوميكالىق باعىتتىڭ ءبىرى. جوسپاردا مەملەكەت باسشىسىنىڭ تاپسىرماسى بويىنشا بيزنەسكە قاتىستى كارانتيندىك شارانى جەڭىلدەتۋدى قايتا قارادى. سونداي-اق تاريفتەردى، ونىڭ ىشىندە كولىك جانە لوگيستيكا سالاسىنداعى تابيعي مونوپوليستەردىڭ قىزمەتتەرىنە تومەندەتۋ شاراسى قابىلداندى»، - دەدى ءاليحان سمايىلوۆ ەلوردادا ءوتىپ جاتقان «اتامەكەن» ۇلتتىق كاسىپكەرلەر پالاتاسىنىڭ كەزەكتەن تىس ءىح سەزىندە.
ونىڭ ايتۋىنشا، قازىرگى ۋاقىتتا ۇكىمەت قاڭتار ايىنداعى وقيعالار بارىسىندا شاعىن جانە ورتا بيزنەسكە كەلگەن مۇلىكتىك زياندى قالپىنا كەلتىرۋ جۇمىستارى ءجۇرىپ جاتىر.
«حالىقتىڭ تابىسىن ارتتىرۋدىڭ ارنايى باعدارلاماسى ازىرلەنۋدە. ونىڭ ىشىندە جۇمىسپەن قامتۋ ءىسىن جالعاستىرۋ، يندۋستريالىق جانە اۋىل شارۋاشىلىعى جوبالارىن ىسكە اسىرۋ جوسپارى بار. سونىمەن قاتار ءوندىرىستى تەحنولوگيالىق جاڭعىرتۋ، حالىق كىرىسىندەگى تەڭگەرىمسىزدىكتى تەڭەستىرۋ جانە ادامي كاپيتالدى دامىتۋ جونىندەگى شارالار جوسپارلانىپ وتىر. حالىقتىڭ تابىسىن ارتتىرۋ ءۇشىن دە، بيزنەستى تابىستى جۇرگىزۋ ءۇشىن دە ينفلياسيا دەڭگەيىن تومەندەتۋ ماڭىزدى»، - دەيدى ول.
سونداي-اق، ۇكىمەت باسشىسى جاھاندىق پاندەمياعا بايلانىستى الەم ەلدەرىندە ينفلياسيانىڭ ءوسۋى ساقتالىپ تۇرعانىن ايتتى.