ۇكىمەت ەڭ تومەنگى جالاقىنى انىقتاۋ ادىستەمەسىن جاڭارتۋدى جوسپارلاپ وتىر.
بۇل تۋرالى پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين سەنات وتىرىسىنان كەيىنگى بريفينگتە ايتتى، - دەپ حابارلايدى aqshamnews.kz.
ءمينيستردىڭ سوزىنشە، ءقازىر ەڭ تومەنگى جالاقىنى ەسەپتەۋدە ورتاشا جانە مەدياندىق ەڭبەكاقى كورسەتكىشتەرى قولدانىلىپ ءجۇر. الايدا ولاردىڭ قايسىسىن نەگىزگە الۋ كەرەكتىگى ءالى ناقتى ايقىندالماعان.
"ەڭ تومەنگى جالاقىنىڭ مەدياندىق ەڭبەكاقىنىڭ 45–50 پايىزىنا تەڭ بولۋى كەرەك دەگەن پىكىرلەر بار. سوندىقتان ادىستەمەنىڭ بار تالاپتارىن بىرىزدەندىرىپ، ناقتى انىقتاپ الۋ قاجەت"، - دەدى جۇمانعارين.
ول جاڭا ءتاسىلدى ەنگىزۋ فيسكالدىق شوعىرلاندىرۋدى قاجەت ەتەتىنىن اتاپ ءوتتى.
"بيۋدجەت كىرىسىن ارتتىرىپ، ءتيىمسىز شىعىستاردى قىسقارتۋ كەرەك. پرەمەر-مينيستر بۇگىن وسى باعىتتاعى جوسپارلاردى ءتۇسىندىردى. 2026 جىلدىڭ العاشقى جارتى جىلدىعىندا سالىق جانە بيۋدجەت رەفورمالارىنىڭ ناتيجەسىن كورەتىن بولامىز. سول كەزدە 2027–2029 جىلدارعا ارنالعان بيۋدجەت ۇسىنىلادى. ەڭ تومەنگى جالاقى ماسەلەسى دە سول كەزەڭدە قارالادى"، - دەدى مينيستر.