قازاقستاندا ەلەكتر كولىگىنىڭ سانىن ۇلعايتۋ ىنتالاندىرىلۋدا
ق ر پرەمەر-مينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ەكولوگيانى جاقسارتۋ ماسەلەلەرى قارالدى. ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعالييەۆ، شىعىس قازاقستان وبلىسىنىڭ اكىمى دانيال احمەتوۆ، الماتى قالاسىنىڭ اكىمى باقىتجان ساعىنتايەۆ، قاراعاندى وبلىسىنىڭ اكىمى جەڭىس قاسىمبەك بايانداما جاسادى، دەپ حابارلادى Almaty-akshamy.kz. پرەمەر-مينيستردىڭ سايتىنا سىلتەمە جاساپ.
Nur Otan پارتياسىنىڭ باعدارلاماسىن ورىنداۋ اياسىندا 2 ملرد اعاش وتىرعىزۋ، ەلىمىزدىڭ سولتۇستىك وڭىرلەرىن گازداندىرۋ، 6 قوقىس وڭدەۋ زاۋىتىن سالۋ جوبالارىن ىسكە اسىرۋدى باستاۋ جانە ت. ب. بويىنشا اۋقىمدى جۇمىستار قولعا الىندى. كولىك قۇرالدارى شىعارىندىلارىنىڭ اتموسفەراعا اسەرىن تومەندەتۋ ءۇشىن قوعامدىق كولىكتى گازعا اۋىستىرۋ بويىنشا بەلسەندى جۇمىس جۇرگىزىلىپ جاتىر. قابىلدانىپ جاتقان شارالار 2025 جىلعا قاراي 10 قالادا اتموسفەرانىڭ لاستانۋ يندەكسىن جوعارى دەڭگەيدەن ورتاشا دەڭگەيگە دەيىن تومەندەتۋگە جانە جالپى العاندا، اۋا ساپاسىن جاقسارتۋعا مۇمكىندىك بەرەدى. جۇيەلى ەكولوگيالىق پروبلەمالاردى شەشۋ ماقساتىندا ۇزدىك الەمدىك پراكتيكالاردى ەسكەرە وتىرىپ، جاڭا ەكولوگيالىق كودەكس قابىلداندى، ونىڭ ەلەمەنتتەرىنىڭ ءبىرى — ءىرى وندىرىستەردە وزىق تەحنولوگيالاردى ەنگىزۋ. جەرگىلىكتى اتقارۋشى ورگاندار جۇرتشىلىقپەن بىرلەسىپ، قورشاعان ورتانىڭ لاستانۋ دەڭگەيىن تومەندەتۋگە، كوگالداندىرۋعا، «تاريحي» لاستانۋلاردى جويۋعا باعىتتالعان جول كارتالارىن ازىرلەپ، بەكىتتى.
پرەمەر-مينيستر اۆتوپاركتى جاڭارتۋ بويىنشا كەشەندى شارالاردى ودان ءارى ىسكە اسىرۋدى، وتىن ساپاسى مەن شىعارىندىلار كولەمىنە باقىلاۋدى كۇشەيتۋدى، ەلەكتر كولىگى سانىنىڭ ءوسۋىن ىنتالاندىرۋدى تاپسىردى.
ۇكىمەت باسشىسى جاقىندا ەلەكتروموبيلدەرگە كادەگە جاراتۋ الىمىن الىپ تاستاۋدى مىسالعا كەلتىردى. اسقار مامين ەكولوگيانى جاقسارتۋ بويىنشا وڭىرلىك جول كارتالارىن، اسىرەسە، بيىل ءىس-شارالاردىڭ جارتىسىنان ازى ورىندالعان نۇر-سۇلتان جانە الماتى قالالارىنا ورىنداۋدى جانداندىرۋ قاجەت ەكەنىن اتاپ ءوتتى. ۇكىمەت باسشىسى اتموسفەراعا شىعارىندىلاردى ازايتۋ ماقساتىندا ونەركاسىپتىك كاسىپورىندار ءۇشىن ەڭ وزىق قولجەتىمدى تەحنولوگيالار بويىنشا انىقتامالىقتاردى ۋاقىتىلى ازىرلەۋدى تاپسىردى. يندۋستريا جانە ينفراقۇرىلىمدىق دامۋ مينيسترلىگىنە ەكولوگيا، گەولوگيا جانە تابيعي رەسۋرستار، سونداي-اق قارجى مينيسترلىكتەرىمەن بىرلەسىپ، قاتتى تۇرمىستىق قالدىقتارعا ارنالعان پوليگونداردىڭ ۇلگىلىك جوباسىن ازىرلەۋ، اكىمدىكتەرمەن بىرلەسىپ، ارەكەت ەتىپ تۇرعان زاڭنامانىڭ جاڭا تالاپتارىنا سايكەس، قۇرىلىس پوليگوندارىن قۇرۋ ماسەلەسىن پىسىقتاۋ تاپسىرىلدى.
پرەمەر-مينيستر سونداي-اق كارىز-تازارتۋ قۇرىلىستارىن سانيتارلىق-ەكولوگيالىق تالاپتارعا سايكەستەندىرۋ جونىندەگى جۇمىستى جانداندىرۋدى تاپسىردى. ۇكىمەت باسشىسى اكىمدەرگە اعاش وتىرعىزۋ جوسپارلارىنىڭ ورىندالۋىن، كوشەت ماتەريالىن ءوسىرۋ ءۇشىن ءتالىمباقتار مەن ورمان شارۋاشىلىقتارىنىڭ جاي-كۇيىن ەرەكشە باقىلاۋعا الۋدى تاپسىردى.
اسقار مامين ونەركاسىپتىك كاسىپورىنداردىڭ، جەو-نىڭ، اۆتوكولىكتىڭ اتموسفەراعا شىعارىندىلارىنا باقىلاۋدى كۇشەيتۋ قاجەتتىگىن اتاپ ءوتتى. يندۋستريا جانە ينفراقۇرىلىمدىق دامۋ مينيسترلىگىنە اۆتوكولىكتى تەحنيكالىق باقىلاۋ ستانسيالارىنىڭ جاۋاپكەرشىلىگىن كۇشەيتۋ تاپسىرىلدى.