وسى جىلعى قاڭتار-مامىردا رەسپۋبليكا كاسىپورىندارىندا جازاتايىم وقيعالاردىڭ سالدارىنان 564 ادام زارداپ شەكتى.
ونىڭ 19،5%-ى تاۋ-كەن مەتاللۋرگيا كەشەنى كاسىپورىندارىندا، 4،5%-ى كوممۋنالدىق شارۋاشىلىقتا جانە 10%-ى – قۇرىلىس سالاسىندا.
ق ر پرەمەر-مينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا كاسىپورىنداردا ءقاۋىپسىز ەڭبەك جاعدايلارىن قامتاماسىز ەتۋ شارالارى قارالدى، دەپ حابارلادى Almaty-akshamy.kz. ق ر پرەمەر-مينيستردىڭ سايتىنا سىلتەمە جاساپ.
ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ، توتەنشە جاعدايلار ءمينيسترى يۋريي يلين، قوستاناي وبلىسىنىڭ اكىمى ارحيمەد مۇحامبەتوۆ، پاۆلودار وبلىسىنىڭ اكىمى ءابىلقايىر سقاقوۆ بايانداما جاسادى. بيىل جىل باسىنان بەرى وندىرىستىك جاراقاتتانۋ دەڭگەيى 1 مىڭ ادامعا 0،08 قۇرادى (2020 جىلعى 5 ايدا – 0،07).
وندىرىستىك جاراقاتتانۋدىڭ جوعارى دەڭگەيى قاراعاندى، شىعىس قازاقستان جانە اقتوبە وبلىستارىندا ساقتالۋدا. بۇل كورسەتكىشتىڭ تومەندەۋىنىڭ وڭ سەرپىنى قوستاناي جانە پاۆلودار وبلىستارىندا بايقالادى. وتىرىستا ءقاۋىپسىز ەڭبەكتى قامتاماسىز ەتۋ جونىندەگى 2025 جىلعا دەيىنگى ءىس-قيمىل جوسپارى بەكىتىلدى. قۇجات تاۋەكەلگە باعدارلانعان ءتاسىل نەگىزىندە ەڭبەكتى قورعاۋدى باسقارۋدىڭ ۇلتتىق جۇيەسىن جاڭعىرتۋدى، جۇمىس ورىندارىندا كاسىپتىك تاۋەكەلدى ازايتۋ بويىنشا جۇمىس بەرۋشىلەردى ەكونوميكالىق ىنتالاندىرۋ جونىندە ۇسىنىستار ازىرلەۋدى، ەڭبەكتى قورعاۋ سالاسىنداعى كاسىپتىك بىلىكتىلىك پەن عىلىمي الەۋەتتى، الەۋمەتتىك ارىپتەستىكتى دامىتۋدى كوزدەيدى. جوسپاردى ىسكە اسىرۋ ناتيجەسىندە وندىرىستىك جاراقاتتانۋ 10%-عا، زياندى ەڭبەك جاعدايلارىندا جۇمىس ىستەيتىن جۇمىسكەرلەر سانى 20%-عا دەيىن تومەندەيدى دەپ بولجانعان. «وندىرىستىك كاسىپورىنداردا حالىقارالىق «Vizion Zero» نولدىك جاراقاتتانۋ تۇجىرىمداماسىن بەلسەندى ەنگىزۋ قاجەت. ءاربىر جاراقاتتانۋ جاعدايى توتەنشە جاعدايلار مينيسترلىگىندە مۇقيات تالدانىپ، قورىتىندىسى بويىنشا ولاردى بارىنشا ازايتۋ ءۇشىن كەشەندى شارالار ازىرلەنۋى ءتيىس. حالىقارالىق ستاندارتتارعا سايكەس كەلەتىن كاسىبي سىن-تەگەۋرىندەردى باعالاۋ جانە باسقارۋ جۇيەسىن ەنگىزۋ قاجەت»، — دەدى اسقار مامين.
پرەمەر-مينيستر تاۋ-كەن مەتاللۋرگيا كەشەنى مەن قۇرىلىس سالاسى كاسىپورىندارىنا ەرەكشە نازار اۋدارا وتىرىپ، وندىرىستىك جاراقاتتانۋدى ازايتۋ جونىندەگى جۇمىستى جانداندىرۋ قاجەت ەكەنىن اتاپ ءوتتى. ۇكىمەت باسشىسى وسى جىلدىڭ 1 جەلتوقسانىنا دەيىن جۇمىس بەرۋشىلەر ءۇشىن ەڭبەك قاۋىپسىزدىگى تالاپتارىنا سايكەستىك بويىنشا ءوزىن-وزى باقىلاۋعا ونلاين-پلاتفورما ازىرلەۋدى، سونداي-اق ۇكىمەتتىڭ قاراۋىنا ەڭبەك جاعدايلارىن جاقسارتۋدا جۇمىس بەرۋشىلەردى ەكونوميكالىق ىنتالاندىرۋدى ارتتىرۋ تۇرعىسىنان زاڭنامانى جەتىلدىرۋ بويىنشا ۇسىنىستار ەنگىزۋدى تاپسىردى. توتەنشە جاعدايلار مينيسترلىگىنە مۇددەلى مەملەكەتتىك ورگاندارمەن بىرلەسىپ، وسى جىلدىڭ 1 قىركۇيەگىنە دەيىن ءقاۋىپتى وندىرىستىك وبەكتىلەردەگى اپاتتىلىقتى ازايتۋ جونىندەگى جول كارتاسىن بەكىتۋ تاپسىرىلدى. وڭىرلەردىڭ اكىمدىكتەرىنە كاسىپورىندارمەن بىرلەسىپ، بيىلعى 1 قىركۇيەككە دەيىن ءقاۋىپسىز ەڭبەك جاعدايلارىن قامتاماسىز ەتۋ جونىندەگى جول كارتالارىن بەكىتۋ تاپسىرىلدى.
پرەمەر-مينيستر سونداي-اق وسى جىلدىڭ سوڭىنا دەيىن كاسىپورىندارمەن وندىرىستەگى جازاتايىم وقيعالاردان ساقتاندىرۋ شارتتارىن جاساسۋ بويىنشا جۇمىس جۇرگىزۋدى تاپسىردى.