كەنشىلەردىڭ كوبى گازدان ۋلانعان.
قازاقستان پرەمەر-مينيسترى ءاليحان سمايىلوۆ "ارسەلورميتتال تەمىرتاۋ" اق كوستەنكو اتىنداعى شاحتادا ءورت سالدارىنان زارداپ شەككەن كەنشىلەرگە باردى، دەپ حابارلايدى Almaty-akshamy.kz ۇكىمەتتىڭ باسپا ءسوز قىزمەتىنە سىلتەمە جاساپ.
قازىرگى ۋاقىتتا پروفەسسور ح.ج.ماقاجانوۆ اتىنداعى كوپسالالى اۋرۋحانادا زارداپ شەككەن 20 ادام قاجەتتى ەم قابىلداپ جاتىر.
باس دارىگەر ەركىن-داۋىر قۇرمانعالييەۆتىڭ ايتۋىنشا، ناۋقاستار ءارتۇرلى اپپاراتتار، سونىڭ ىشىندە كت جانە ۋدز ارقىلى، سونداي-اق ءتۇرلى سالا ماماندارىن تارتۋ ارقىلى تولىق تەكسەرىلگەن. ولاردىڭ كوپشىلىگى گازدان ۋلانعان، بارلىعىنىڭ جاعدايى تۇراقتى، ومىرىنە ءقاۋىپ ءتونىپ تۇرعان جوق.
پرەمەر-مينيستر زارداپ شەككەندەرگە بارلىق قاجەتتى مەديسينالىق كومەك كورسەتىلۋى كەرەكتىگىن قاداپ ايتتى.
"تەز ساۋىعىپ، وتباسىلارىڭىزعا ورالۋلارىڭىزعا تىلەكتەسپىن"، - دەدى ءاليحان سمايىلوۆ.
شاحتەرلەردىڭ ءبىرى قازا تاپقان كەنشىلەردىڭ وتباسىلارىنا قانداي كومەك بەرىلەتىنىن سۇرادى.
"بۇل – شىنىمەن دە وتە اۋىر قاسىرەت. قايعىلارىڭىزعا ورتاقتاسىپ، كوڭىل ايتامىز. بۇگىن مەملەكەت باسشىسى قازا تاپقانداردىڭ وتباسىلارىنا قاجەتتى قاراجات ءبولۋ تۋرالى تاپسىرما بەردى. تولىعىمەن قولداۋ كورسەتەمىز: باسپانا، نەسيەلەردى وتەۋ، بالالاردى وقىتۋ، ءبىرجولعى تولەمدەر – مۇنىڭ بارلىعىمەن قامتاماسىز ەتەمىز"، - دەدى پرەمەر-مينيستر.