بۇل ماسەلە ەرەكشە باقىلاۋدا تۇر.
قازاقستاننىڭ پرەمەر-مينيسترى ءاليحان سمايىلوۆ ەنەرگەتيكا مينيسترلىگىنە قازاقستاندا ەلەكتر ەنەرگياسىنىڭ تاپشىلىعى تۋىنداۋىنا جول بەرمەۋدى جانە زاڭسىز ماينەرلەرگە قاتىستى قاتاڭ شارا قولدانۋدى تاپسىردى، دەپ حابارلايدى Almaty-akshamy.kz ۇكىمەتتىڭ باسپا ءسوز قىزمەتىنە سىلتەمە جاساپ.
ۇكىمەتتە وتكەن سۋ كەڭەسىنىڭ وتىرىسىندا قىرعىزستانمەن اراداعى ەلەكتر ەنەرگياسىمەن تاۋار ايىرباسى جانە قازاقستاننىڭ وڭتۇستىك وڭىرلەرىن سۋمەن قامتاماسىز ەتۋ ماسەلەلەرى قارالدى.
قازاقستان مەن قىرعىز تاراپتارى ەلەكتر ەنەرگياسىنىڭ تاۋار ايىرباسى جانە سۋمەن جابدىقتاۋ بويىنشا ءوزارا ءتيىمدى تالاپتار نەگىزىندە كەلىسىمشارت جاسادى.
«قازاقستاننىڭ وڭتۇستىك وڭىرلەرىن سۋمەن قامتاماسىز ەتۋ ماسەلەسى باسىمدىققا يە. حالىقتىڭ الەۋمەتتىك تىنىشتىعى مەن امان-ساۋلىعى ۇكىمەتتىڭ نەگىزگى مىندەتى بولىپ تابىلادى. بۇل ماسەلە ەرەكشە باقىلاۋدا تۇر»، - دەدى سمايىلوۆ.