الماتىدا بانكتىڭ كەڭەسشىسى كليەنتتەردىڭ اقشاسىن يەمدەنىپ العان

22 جاستاعى ي.ەسىمدى قىز ۇستالدى.

الماتىدا بانكتىڭ ستاجەر-كەڭەسشىسى كليەنتتەردىڭ شوتىنان اقشا شەشىپ العان، دەپ حابارلايدى Almaty-akshamy.kz Polisia.kz-كە سىلتەمە جاساپ.

الاياقتىق ارەكەتتەردى جاساعانى ءۇشىن 22 جاستاعى ي.ەسىمدى قىز ۇستالدى. ول ەكىنشى دەڭگەيلى بانكتەردىڭ ءبىرىنىڭ كليەنتتەرىن الداعان.

«ونىڭ باستاپقىدا قىلمىستىق نيەتپەن بانككە ستاجەر بولىپ جۇمىسقا ورنالاسقانى انىقتالدى. ول كەڭەسشى بولدى. ونىڭ فۋنكسيونالدىق مىندەتتەرىنە كليەنتتەرگە سمارتفوندارىنا ءموبيلدى قوسىمشانى ورناتۋعا جانە ولاردىڭ بانك كارتالارىن رەسۋرسقا قوسۋعا كومەكتەسۋ كىرەدى. كەيبىر جاعدايلاردا قاسكۇنەم كليەنتتىڭ كامەراسى بەينەتەكسەرۋدى قولدامايتىنىن العا تارتىپ، ولارعا ءوز سمارتفونى ارقىلى جەكە كابينەتتەر اشقان. بۇل ي.ەسىمدى ازاماتشاعا ورناتۋ كەزىندە پايدالانۋشىلاردىڭ جەكە دەرەكتەرىن سكرينشوتتاۋعا مۇمكىندىك بەردى. سودان كەيىن ول كليەنتتەردىڭ جەكە دەرەكتەرى مەن قۇپيا ءسوزىن پايدالانىپ، قوسىمشاعا كىرىپ، ولاردىڭ شوتتارىنان اقشانى شەشىپ العان. كوبىنەسە اقشانى ءۇشىنشى ادامداردىڭ كارتاسىنا اۋدارعان»، – دەدى الماتى قالالىق پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.

كۇدىكتىگە قاتىستى ق ر قك-نىڭ 190-بابىندا (الاياقتىق) كوزدەلگەن قىلمىس بويىنشا قىلمىستىق ءىس تەرگەلۋدە. ونىڭ جەكە باسىنىڭ باسقا دا زاڭسىز ارەكەتتەرگە قاتىسىنىڭ بار-جوعى تەكسەرىلۋدە.