ۇكىمەت وتىرىسىندا ۇكىمەت باسشىسى ءاليحان سمايىلوۆ وقۋ-اعارتۋ مينيسترلىگى مەن عىلىم جانە جوعارى ءبىلىم مينيسترلىگىنە ءبىرقاتار تاپسىرما جۇكتەدى.
ق ر پرەمەر-مينيسترى ءاليحان سمايىلوۆ اۋىل بالالارىن قوسىمشا بىلىممەن قامتۋدى ۇلعايتۋدى تاپسىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«وقۋ-اعارتۋ مينيسترلىگى مۇددەلى مەملەكەتتىك ورگاندارمەن بىرلەسىپ، «جايلى مەكتەپ» ۇلتتىق جوباسىن پىسىقتاۋ بويىنشا بارلىق شارالاردى قابىلداۋى ءتيىس. ونى «Bilimdi Últ» ۇلتتىق جوباسىمەن جەدەل ۇيلەستىرۋ قاجەت. جالپى، «Bilimdi Últ» ۇلتتىق جوباسىنىڭ جوسپارلانعان بارلىق كورسەتكىشتەرىنە قول جەتكىزۋى كەرەك»، - دەدى ءاليحان سمايىلوۆ ۇكىمەت وتىرىسىندا.
سونىمەن قاتار پرەمەر-مينيستر مەكتەپكە دەيىنگى ۇيىمدار قىزمەتىنىڭ ساپاسىن ارتتىرۋ ءۇشىن وقۋ-اعارتۋ مينيسترلىگىنە بيىلعى 1 قاراشاعا دەيىن مەكتەپكە دەيىنگى ۇيىمداردى ليسەنزيالاۋ ماسەلەلەرىن پىسىقتاۋدى تاپسىردى.
«وقۋ-اعارتۋ مينيسترلىگى مادەنيەت جانە سپورت مينيسترلىگىمەن، ءوڭىر اكىمدىكتەرىمەن بىرلەسىپ، اۋىلدىق جەرلەردە بالالاردى قوسىمشا بىلىممەن قامتۋدى ۇلعايتسىن»، - دەدى ۇكىمەت باسشىسى.
سمايىلوۆ اتاعانداي، ءوڭىر اكىمدىكتەرى جاستاردىڭ جۇمىسپەن قامتىلۋىن ارتتىرۋ ماقساتىندا مەملەكەتتىك ءبىلىم بەرۋ تاپسىرىسى نەگىزىندە كوللەدجدەرگە قابىلداۋدى ۇلعايتۋدى قامتاماسىز ەتۋى كەرەك.
«عىلىم جانە جوعارى ءبىلىم مينيسترلىگىنە قارجى، ۇلتتىق ەكونوميكا مينيسترلىكتەرىمەن بىرلەسىپ، ەلىمىزدىڭ وڭىرلىك جەتەكشى مەملەكەتتىك ۋنيۆەرسيتەتتەرىنىڭ بازاسىندا اكادەميالىق ارتىقشىلىق ورتالىقتارىن قۇرۋ ماسەلەلەرىن پىسىقتاۋدى تاپسىرامىن. وسى جۇمىستى ۇيلەستىرۋ جانە باقىلاۋ ەرالى لۇقپانۇلىنا جۇكتەلەدى»، - دەدى ول.