الماتى كاتاردان كەلگەن ءبىرىنشى ۇيىمداسقان ىسكەرلىك تۋريستەر توبىن قارسى الدى.
ءىرى ريتەيل كومپانيا الماتىعا 47 قىزمەتكەرىن جىبەرگەن ەدى. ساياحات كەزىندە 5 كۇن بويى اراب تۋريستەرى قالانىڭ ەڭ تانىمال كورنەكتى جەرلەرىن ارالايدى، دەپ حابارلايدى Almaty-akshamy.kz.
قازىرگى تاڭدا الماتىعا تاياۋ شىعىس ەلدەرىنەن تۋريستەر كوپتەپ كەلۋدە. ءبىرىنشى توقساندا قالاعا 55 مىڭنان استام شەتەلدىك تۋريست كەلگەن، بۇل وتكەن جىلمەن سالىستىرعاندا 2،5 ەسەگە ارتىق. ولاردىڭ ءبىر بولىگى كاتار، ءباا، ساۋد ارابياسى ەلدەرىنىڭ ينۆەستورلارى مەن تۋريستەرى.
مامانداردىڭ ايتۋىنشا، بۇل قالانى حالىقارالىق نارىقتا ىلگەرىلەتۋ ءۇشىن الماتى قالاسىنىڭ اكىمدىگى مەن تۋروپەراتورلاردىڭ بىرلەسىپ جۇزەگە اسىرعان حالىقارالىق ءىس-شارالارىنىڭ، اۋە قاتىناسىن قالپىنا كەلتىرۋ مەن شەكارانى اشۋدىڭ ارقاسىندا مۇمكىن بولعان. مىسالى، «Dubai ATM - 2022» تۋريستىك كورمەسىنە، كاتار، ءباا، ساۋد ارابياسى مەن ومان ەلدەرىنىڭ ءىرى قالالارىنداعى روۋد-شوۋلارعا قاتىسۋ.
«الماتى قاراپايىم ساياحاتشىلار مەن بيزنەس تۋريستتەر اراسىندا كەڭ تانىلىپ كەلەدى. بۇگىن ءبىز كاتاردان كەلگەن العاشقى ۇيىمداسقان ىسكەرلىك تۋريستتەر توبىن قارسى الدىق. قابىلدانعان شارالاردىڭ ارقاسىندا الماتىعا دەگەن تۋريستتىك دەستيناسيا رەتىندەگى قىزىعۋشىلىق ارتىپ وتىر. بۇل جۇمىس ۇزدىكسىز جالعاسا بەرەدى. تاياۋ شىعىستان تۋريستتىك اعىمدى ارتتىرۋ قالامىز ءۇشىن وتە ماڭىزدى. وزگە ەلدەرمەن سالىستىرعاندا تاياۋ شىعىستان كەلگەن تۋريستتەردىڭ ورتاشا چەگى الدەقايدا جوعارى»، - دەدى «الماتى قالاسىنىڭ تۋريستتىك اقپاراتتىق ورتالىعى» ج ش س ديرەكتورى ەدىگە مارعۇلان.
ايتا كەتسەك، 2021 جىلدىڭ سوڭىندا الماتى – دوحا جاڭا رەيسى ىسكە قوسىلدى. ءقازىر وسى باعىتتاعى رەيستەر سانى اپتاسىنا تورتكە دەيىن كوبەيدى. Qatar Airways جىل باسىنان بەرى 100 استام رەيس جاسادى. رەيستەر ا-320 ءتيپتى اۋە كەمەسىمەن ورىندالادى.