مينيستر مەكتەپتەردى جايلى، ءقاۋىپسىز ءارى قازىرگى زامانعا ساي قامتاماسىز ەتۋ ماسەلەسىن كوتەردى.
ۇكىمەت وتىرىسىندا وقۋ-اعارتۋ ءمينيسترى اسحات ايماعامبەتوۆ 2021 جىلى 200 مەكتەپتىڭ ورنىنا 277 مەكتەپ سالىنعانىن دا اتاپ ءوتتى، دەپ حابارلايدى Almaty-akshamy.kz BAQ.kz-كە سىلتەمە جاساپ.
«سوڭعى كەزدە ەسكىرگەن، دەر كەزىندە كۇردەلى جوندەۋدەن وتپەگەن مەكتەپتەردىڭ اپاتتىق جاعدايى ءقاۋىپ تۋدىرۋى تىركەلىپ جاتىر. ايتىلعان وقيعالار ساباقتان تىس ۋاقىتتا بولعانىنا بايلانىستى عانا وقۋشىلاردىڭ ومىرىنە ءقاۋىپ تونگەن جوق. وسىعان وراي بارلىق اكىمدىكتەردەن سالىنعانىنا 50 جىلدان استام مەكتەپتەرگە ءتيىستى تەحنيكالىق اۋديت جۇرگىزۋىن سۇرايمىن»، - دەدى ول.
ايماعامبەتوۆ اتاعانداي، ءبىلىم ساپاسىنا قازىرگى زامانعى كابينەتتەردىڭ قامتاماسىز ەتىلۋى ماڭىزدى ءرول اتقارادى.
«2021 جىلى جوسپار بويىنشا 949 مەكتەپكە 1825 ءپان كابينەتى ساتىپ الىنىپ، جوسپار ورىندالدى. بيىل فيزيكا، حيميا، بيولوگيا، ستەن پاندىك كابينەتتەرمەن مەكتەپتەردىڭ 70 پايىزى قامتىلادى. وسى جۇمىس جۇرگىزىلىپ جاتىر. ءبىراق بىزدەگى اقپاراتقا سايكەس، ۇلىتاۋ، جامبىل وبلىستارى ءتيىستى قاراجاتتى ءالى تولىعىمەن شەشپەگەن. سوندىقتان اكىمدىكتەردى وسى تاۋەكەلدىڭ بولدىرماۋىن سۇرايمىن. جىلدىڭ سوڭىنا دەيىن ۋاقىت بار. وسى جۇمىستى باقىلاۋلارىڭىزعا الۋعا ءوتىنىش بىلدىرەمىن»، - دەدى اسحات ايماعامبەتوۆ.
مينيستر مەكتەپتەردى جايلى، ءقاۋىپسىز ءارى قازىرگى زامانعا ساي قامتاماسىز ەتۋ ماقساتىندا 2021 جىلى 200 مەكتەپتىڭ ورنىنا 277 مەكتەپ سالىنعانىن ايتتى.
بۇعان جەكە سەكتوردىڭ قاتىسۋى سەبەپ بولدى. كەستەدە كورسەتىلگەن 10 ءوڭىر 42 جاڭا مەكتەپتى سالۋ بويىنشا جوسپاردى تولىق ورىندامادى. ءبىز جەكە مەنشىك مەكتەپتەردىڭ ۇلەسىن ارتتىرىپ جاتىرمىز، - دەدى ول.