ۇكىمەتتە الەۋمەتتىك ماڭىزى بار ازىق-تۇلىك تاۋارلارى باعاسىن تۇراقتاندىرۋ ماسەلەلەرى ايتىلدى.
ونىڭ بارىسىندا پرەمەر-مينيستر اتالعان باعىتتاعى جەرگىلىكتى اكىمدەردىڭ جۇمىسىنا كوڭىلى تولمايتىنىن ايتتى، دەپ حابارلايدى Almaty-akshamy.kz.
بيىلعى مىندەت – 2023 جىلدىڭ قورىتىندىسى بويىنشا ينفلياسيا دەڭگەيىن 9،5 پايىزدان اسىرماۋ. پرەمەردىڭ ايتۋىنشا، بۇعان قول جەتكىزۋگە ابدەن بولادى. تەك بۇل ءۇشىن بارلىق وڭىرلەردىڭ ازىق-تۇلىك باعاسىن تۇراقتاندىرۋ، اسىرەسە، ماۋسىمارالىق كەزەڭدە باعانى ۇستاپ تۇرۋ ءۇشىن جەرگىلىكتى اتقارۋ ورگاندارىنىڭ بەلسەندى جۇمىسى قاجەت.
«سىزدەردە قاجەتتى قۇرالداردىڭ ءبارى بار. ءبىز وتكەن جىلعى ەگىننەن قاجەتتى قور جيناپ الدىق. سوندىقتان بەلگىلەنگەن باعا بويىنشا كوكونىس ونىمدەرىنەن تاپشىلىق بولماۋى ءتيىس ەدى. اكىمدەرگە باعانى ۇستاۋ ءۇشىن قاجەتتى تەتىكتەردىڭ بارلىعىن بەردىك. قارجى دا ءبولىندى. ءبىراق باعا ءبارىبىر ءوسىپ كەلە جاتىر. اكىمدىكتەردىڭ ءتيىمدى جۇمىسىن كورىپ وتىرعان جوقپىز. جەرگىلىكتى جەرلەردە اتالعان ماسەلەلەرگە سالعىرت قاراۋدىڭ كەسىرىنەن باعانىڭ ءوسۋى توقتايتىن ەمەس»، - دەدى ءاليحان سمايىلوۆ.
سونداي-اق، ۇكىمەت باسشىسى وڭىرلەرگە پياز بويىنشا كەلىسىمشارت جاساۋ تاپسىرىلعانىن جانە اكىمدەر ءونىم كولەمى جەتكىلىكتى دەپ بىرنەشە رەت بىزگە بايانداعانىن ايتا كەلىپ: «ەندەشە پياز باعاسى نەگە قىمباتتاپ بارا جاتىر؟» دەگەن زاڭدى ساۋال قويدى. ەلىمىزدە پياز كوپ وسەدى. الايدا ۇكىمەت باعانى تومەندەتۋ ءۇشىن پياز ەكسپورتىنا تىيىم سالىپ، شۇعىل شارالار قابىلداۋعا ءماجبۇر.
«تاعى دا قايتالاپ ايتامىن، ازىق-تۇلىك ونىمدەرىنە باعانى تۇراقتاندىرۋ – ۇكىمەت پەن جەرگىلىكتى اتقارۋشى ورگانداردىڭ اسا ماڭىزدى نەگىزگى مىندەتى. جۇمىسقا نەمقۇرايلى قاراۋ ورىن السا جانە ناتيجە بولماسا، ءتيىستى شەشىمدەر قابىلدانادى. بۇل تۋرالى بۇعان دەيىن دە ايتىلدى»، - دەدى ءا.سمايىلوۆ.